Folketingimut qinigassanngortitat Siumumi oqallissutaapput

Upaaruaasoq tassaasoq partii Siumumi ilaasortaq Finn Heilmann ilaatigut ima allappoq:

- Siumukkormiuittut ila nalunaarutigisariaqarpara maannamut qinigassanngortinniakkavut, inuit oqartussaaqataanerannit tunuliaquteqanngitsunik toqqaannakkat, Danmarkip naalagaaffia pillugu naalakkersuinikkut imassaqanngimmata piginnaasaqarfiginagulu, allaallumi nikussaarsinnaassuseqanngimmata.

Finn Heilmannip uparuartugai tassaapput Akitsinnguaq Olsen, Doris Jakobsen, Nick Nielsen aamma Vittus Qujaukitsoq.

Doris Jakobsenip Finn Heilmann nutaamik alloriarnissamut ernumanera paasisinnaavaa.

-Tassa oqaluttuarisaanermi Siumut siullerpaamik Juntaartaqarani, Moorsisertaqarani, Lars-Emiilertaqaranilu ingerlasussaavoq, taamaammat aalloriarneq nutaaliornerlu annertoorujussuuvoq. Taamaattumik inuit ilaasa nutaaliorsinnaanermut qunusinnaanerat tupiginngilara, Doris Jakobsen oqarpoq.

Doris Jakobsenillu ilallugu oqaatigaa inuit ataasiakkaat isornatorsiuinerat aallaavigalugu Siumumiit qinigassanngortitaasut nikanarsarneqarnissaat nammineq kissaatiginagu, innuttaasullu kiffaanngissuseqarlutik qinersinissaat aalajangiisuujumaartoq.

- Siumumi sassartitagut tamarmik ajukkunnanngilluinnartuupput, piumassuseqarnertik inuiaqatigiinnut takutittareerpaat. taamaammat nutarterineq peqqinnartuuinnartussaasoq Siumumiit isumaqarpugut, Doris Jakobsen oqarpoq.

Siumup siulittaasua Aleqa Hammond, Finn Heilmannip isornartorsiunera pillugu oqarpoq, partiip iluani pissutsinik assigiinngitsunik isumaqartoqartarnera pissusissamisoortoq, tamannalu imminerminut ajortortaqanngitsoq. Pisumili inuttassarsiuisoqannginnissaa pingaartippaa.

- Pingaarnerpaajuvoq inuup qanoq ittuunera aallaavigalugu isummersunnginnissaq, pingaarnerpaajuvormi politikki ingerlanneqartussaq. Inuup sulinermini anguniagai pingaarnersiuinerminilu saqqummiussai inuiaqatigiit katersuuffigissavaat, nunarput pitsaanerpaamik politikkeqartillugu suliniassammata, Aleqa Hammond oqarpoq.

Finn Heilmanni isornartorsiuinermini ilaatigut aamma allappoq, Siumup siulittaasua tassaasariaqartoq nunarput sinnerlugu qinigassanngortittariaqartoq, sassarsinnaassuseqarnera erseqqarissumillu nukittuumik paatsuugassaanngitsumillu isummertarnera pillugu.

Qinigassanngortinniarnerluni?

- Taamatut oqarnera tusaatissatut tigusinnaavara, nuannaajallaatigalugulu. Kisianni pingaarnerpaatut oqaatigerusuppara, Siumumi pingaarnerpaajunngilaq inuit atii aalajangersimasut sassartissallugit. Pingaarnerpaavorli nunarput sinnerlugu nakuunerpaamik, ersarinnerpaamik nipeqarluta nunarput sinnerlugu sullissisinnaasunik sassartitaqarnissarput, Aleqa Hammond oqarpoq.

Aamma oqarpoq, qinigassanngortittut arlaannaalluunniit apeqqusernagu nunarput sinnerlugu piareersarluarlutik sulisinnaassuseqartut.