Folketingimut qinersissaagut 15. september

Folketingimi ilaasortanngortussat nutaat suliunnaarnersiutit pillugit ukiumi suliffiusussami nutaami aaqqissuusseqqissinnaanissaminnik periarfissinneqartariaqarput, statsministeri Lars Løkke Rasmussen aatsaaginnaq oqarpoq.

- Taamaammat Ataqqinartorsuarmut Dronning Margrethemut Folketingimut Sisamanngornermi septembarip ulluisa 15-ianni qinersisoqartariaqartoq innersuussutigaara, Lars Løkke Rasmussen oqarpoq, Naalakkersuisoqatigiillu tamanna pissutigalugu tunuannginnerat erseqqaisssaatigalugu.

- Partiit Venstre aamma Konservativiit taamaaliorsinnaanerminnut piginnaatitaanertik atorlugu qineqqusaalerput, oqartussallu aningaasartuutaasa ikilisarneqarnissaat anguniarparput. Nunarsuarmimi aningaasarliortoqarpoq, akisussaassusermillu takutitsisariaqarpugut, statsministeri oqarpoq.

Partiillu qiterliunerusut taassuma suleqatiserivai.

- Danmarkimut tamanna pingaaruteqarpoq, ilaqutariinnut inoqutigiinnut pingaaruteqarpoq, qinersilluarnissassinnullu tamassi kissaappassi, statsministeri Lars Løkke Rasmussen naggasiilluni oqarpoq.

Naalakkersuisulli Danmarkimi taarserneqassagunarput. Inunnimmi isumasiuinerit kingulliit takutippaat partiit saamerliit Danmarkimi naalakkersuisuutitaqalissasut.
Inunnik isumasiuisartut Voxmeter isumasiuinerat naapertorlugu partiit saamerliit, Socialdemokratit siulittaasuat Helle Thorning-Schmidt siuttoralugu, ullumikkut qinersisoqartuuppat Folketingimi 97-inik ilaasortaatitaqalissagaluartut.
Folketingimi ilaasortat katillutik 179-iupput, partiillu saamerliit taamaasillutik amerlanerussuteqalissagaluarput.

Nunattalu maannamut ilaasortaatitarisimasai, Lars Emil Johansen, Siumumeersoq, Juliane Henningsenilu, Inuit Ataqatigiinneersoq, Folketingimut qineqqusaanngillat.