Folketingimut qinersineq: Løkkep ministeriuninngorsinnaanissaa Inuit Ataqatigiit mattutinngikkaat

Kalaallit Nunaata Savalimmiullu Folketingimut ilaasortaatitaasa kikkut Danmarkimi naalakkersuisoqatigiiliorsinnaanissaannut aalajangiisooratarsinnaapput. Lars Løkke Rasmussenip (M) ministeriuninngorsinnaanissaa Aaja Chemnitzip mattutinnngilaa.
Lars Løkke Rasmussen partiimi Moderaternemi siulittaasuuvoq, partiilu taanna Folketingimut novembarip aallaqqataani qinersereernermi naalakkersuisoqatigiiliorniarnernut aalajangiisunngoratarsinnaalluni. Assi © : KNR
Allattoq Helle Nørrelund Sørensen
oktobarip 20-at 2022 10:06
Nutserisoq Mads Lynge

Inunnik isumasiuinerup nutaap, Epinionip DR sinnerlugu suliarisimasaata, tamanna takutippaa. DR taama allappoq.

Partiit saamerliit, ministeriuneq Mette Frederiksen siuttoralugu massakkutut isikkoqartillugu 87-inik ilaasortaatitaqalissapput.

Folketingimi amerlanerussusiiniaraanni 90-inik ilaasortaatitaqartoqartassaaq, Kalaallit Nunaanniillu Savalimmiuniillu ilaasortatt katillugit sisamaasut, Mette Frederiksenip ministeriunertut ingerlaannarnissaanut aalajangiisooratarsinnaapput.

Partiillu saamerliit sinnerlugit pingasut, Atlantikup avannaanit ilaasortanngortartut oqaluttuarisaanerup takutippaa, tassa marluk Kalaallit Nunaannit, ataaserlu Savalimmiunit. Kingulleq talerperlerneersuusarpoq.

Inuit Ataqatigiilli partiit saamerliit akornanniikkaluarlutik, Mette Frederiksenimik pinngitsooratik tapersersuiumaarnissartik aamma neriorsuutiginianngilaat.

AAMMA ATUARUK Ministeriunertaarnermit ukioq ataaseq: IA-p attaveqaqatigiilluarneq amigaatigigaa

Siammasissumik naalakkersuisoqatigiiliornissamik tapersersuiniarnini, Folketingimut qinigassanngortitap Aaja Chemnitzip nutaarsiassaqartitsivimmut Altingetimut oqaatigaa, Lars Løkke Rasmussenillu matumani ministeriuninngorsinnaanissaa mattunnagu.
- Lars Løkkep peqataaffigisaanik partiit saamerliit naalakkersuisoqatigiiliorsinnaanissaat mattutinngilarput. Partiit qiterliit peqatigiillutik naalakkersuisoqatigiiliorniarnerannut, Aaja Chemnitz, nittartakkatigut nutaarsiassaqartitsivimmut Altinget Arktisimut oqarpoq.

Socialdemokratit naalakkersuisuuneranni suleqatiginerat ilaatigut matoqqavallaartarsimasoq taassuma oqaatigaa.

Lars Løkke Rasmussenilli partiit talerperliit sinnerlugit ministeriunerusarnerisa nalaani taakku Kalaallit Nunaannik suleqateqarluartarsimasut oqaatigaa. Lars Løkke Rasmussenimi aamma aalajangiisunngoratarsinnaavoq, Mette Frederiksenimullu naleqqiullugu Kalaallit Nunaata piumasaqaataanut amerlanerusunik naaperiaasinnaassappat ministeriunertut toqqarsinnaallugu.

Lars Løkke Rasmussenimi kia ministeriuninngorsinnaanissaanut aalajangiisooratarsinnaasoq inunnik isumasiuinerit maanna takutippaat. Massakkut qinersisoqartuuppat Moderaterne Danmarkimi partiit annersaasa pingajuattut inississagaluarpoq 17-inik ilaasortaatitaqalerluni.

Aamma atuaruk