Folketingimut ilaasortanngortitsineq annerpaamik 300.000 kr.-inik aningasartuutaassaaq
Demokraatit aningaasartuutissaat sapinngisamik sipaarfiussasut, siulittaasua Jens B. Frederiksen oqarpoq. 250.000-it koruunit 300.000-illu koruunit akornanniissangatinneqarput, kingullermilu qinersinermut sanilliullugu ikinnerussangatinneqarlutik:
- Siullermik oqaatigissavara, uagut Danmarkimi partiinit arlaanilluunniit pisiarineqarnikuunngilagut. Taassuma saniatigut aamma uagut partiitut naalakkersuisoqataanitsinnilu inuit sipaarniaqqullugit qinnuigiuartarpagut. Aamma inuiaqatigiinni aningaasakilliornerup takutippaa, piffissaq manna piisaarfiunngitsoq. Taamaammat aamma uagut takutikkusupparput, aningaasanik amerlarsoorsuarnik atuinngikkaluarluta qineqqusaarsinnaalluta, Jens B. Frederiksen akivoq.
Inuit Ataqatigiit kingullermi qinersisoqarmat nunatsinni partiini annersanngorpoq, taakkualu aningaasartuutissaat 200.000-it koruunit missaanniissangatinneqarput.
IA-mi siunnersortip Hans Pavia Egedep oqaatigaa aningaasat atorneqartussat partiip karsianeersuussasut, Danmarkimilu partiinit aningaasaliiffigineqannginnertik erseqqissarlugu:
- Folketingimut qinersinemut immikkut tapiiffigineqarneq ajorpugut, taamaattumik Nunatta Karsianiit politikimi suliniarnitsinni ukiumut tapiissutisiarisartakkatta iluannit politikerillu partiimut akiliutaannik aningaasalersussavarput, Inuit Ataqatigiit allattoqarfianneersoq Hans Pavia Egede oqarpoq.
IA-p qinigassanngortitaasa sisamat illoqarfiit pingasut tikeraassamaarpaat, angalanissamullu aningaasartuutit taamaammat amerlangaatsiarlutik.
Siumup qineqqusaarnissamut missingersuutini avammut tusarliukkusunngilai, siulittaasuatali Aleqa Hammondip erseqqissaatigaa aningaasartuutigineqartussatut naatsorsuussat ingasanngitsut.
Siumup allagartarsui qineqqusaarnermilu takoqqusaarutaat assigiinngitsut Danmarkimi suleqatigisartagaannit Socialdemokratinit ilusilersorneqarlutillu akilerneqarput.
Qineqqusaarnermi takoqqusaarutit suliaritinnerisa saniatigut qineqqusaarnermi pissusilersuutissat periusissallu aamma pikkorissarfigineqarput Socialdemokratit akiligaannik.
Atassutip aningaasat 120.000-it koruunit missaat qineqqusaarnissamut atussamaarai, partiip siulittaasuata Gerhardt Petersenip oqaatigaa.
Aningaasallu partiip karsianeersuunissaat aamma ilisimatitsissutigineqarpoq.
Partiip ataatsip karsiminit nammineq aningaasaliinerata saniatigut partiit Folketingimut kingullermik qinersinermi ikinnerpaamik 1000-init taaguunneqartut, Naalagaaffimmit pissutsinut ministereqarfimmit aningaasanik tapiiffigineqarsinnaapput. Taasineq ataaseq ukiumut 28 koruuninik naleqarpoq.
