Folketingimi ilaasortat isumaqatigiissut naammagisimaarpaat
Folketingimi ilaasortaq Sara Olsvig siornatigut nalunaartaareerpoq misissuinissaq qallunaat ingerlattariaqaraat. Kisianni DIIS-ip misissuisussanngornera susaarnermiit ajunnginnerusoq oqarpoq.
- Massakkut misissuisoqassaaq, aamma ima paasivara Kalaallit Nunaat Danmarkilu suleqatigiillutik misissuissasut. Isumaqarpunga danskit naalakkersuisuisa ima qisuariarnerat, tassa misissuinerup nunatsinniit aamma aqunneqarsinnaaneranik akuersinerat, imaluunniit taamatut naapilluni suleqatigiinneq ajunngitsupilussuusoq. Kommissionilerlugu misissuisoqarnissaa maannakkorpiaq angusinnaanngikkipput nalunngilara, taamaammat ima naapilluni misissuiniarneq ajorisassaanngilaq, Folketingimut ilaasortaq Sara Olsvig IA-meersoq oqarpoq.
Doris Jakobsenip aamma naammagisimaarpaa.
- Una oqaluuserisaq eqqartorneqalermalli oqaatigisarpara akuersaarneqarsinnaanngitsoq CIAp nunatsinni sulerisarsimanera misissorneqanngitsuussappat. Maanna tamanna pisussanngorpoq uannullu pingaarnerpaajuvoq arlaannaannulluunniit pituttorsimanngitsut misissuissammata aamma una iluaqutigisinnaarput siunissami sorsuttoqartillugu Nunatta siunissami pitsaanerusumik illersorneqartarnissaa, Doris Jakobsen Siumumeersoq oqarpoq.
Tamakkiisumik, ataatsimiititaliarsualiornikkut misissuisoqarnissaa, partiip Enhedslistenip Danmarkimi partiini kisiartaalluni piumasariuarsimavaa, nunanullu allanut tunngassuteqartunut ministerip aalajangernera naammagisimanagu.
