Kujataamiut naalakkersuisunngortussat pillugit: Annilaangassutiginera soorlu katattutut ittoq
![](/sites/default/files/styles/image_934x467/public/rena_lange.jpg?itok=3F8cOaVJ)
Isumaginninnerulerneq – Kuannersuarnilu aatsitassarsiulersaarnermut naaggaarluinnarneq.
Naalakkersuisunngortussat, tassa Inuit Ataqatigiit Nalerarlu, tallimanngormat atsioqatigiillutik isumaqatigiissutaat ilaatigut tamakkuusut Kujataani nuannaarutaapput.
Inatsisartunut Kommune Kujallermi, Siumukkormiut siuttuuffigiuaannarnikuusaanni, qinikkat affaat sinnerlugit Inuit Ataqatigiinneersuupput.
IA-kkormiut Kujataani kommunimut qinersinermi aamma ajugaarujussuarput: Siumumeersoq Kiista P. Isaksen borgmesteriujunnaarluni, IA-meersoq Stine Egede qularnanngitsumik borgmesterinngussaaq.
Tassa imaappoq, Kujataamiut Kuannersuarni aatsitassarsiulersaarnermut akerliunerat Inuit Ataqatigiit Kujataani kommunimut qinersinermi ajugaarujussuarnerannut tunngaviuvoq.
![](/sites/default/files/styles/image_934x467/public/rena_lange.jpg?itok=3F8cOaVJ)
- Nuannaaqaanga, annilaangassutiginera soorlu aamma katattutut ippoq, Rena Lange oqarpoq.
- Nunaateqarnermut, savaateqarnermut, immaqalu aammalu immami aalisakkanut inunnullu ajoqutaanissaanut annilaanganarpallaaqimmat.
Makka Titussen isumaqataavoq:
![](/sites/default/files/styles/image_934x467/public/makka_tittusen.jpg?itok=g6hQCDcO)
- Uanga tassa isumaqataasorujussuuvunga uranimut naaggaarama, neriuppunga tassa unitsivillugu unitsinneqassasoq.
Nunatsinni uranisiortoqassanngilaq
Siumup maanna tusarniaassutaasumik Kuannersuarni aatsitassarsiulersaartoqarnera qineqqusaarutigaa. IA-li australiamiut aatsitassarsioqatigiiffiata, Greenland Mineralsip, Kuannersuarni Narsamit kilometerinik arfineq-marlunnik ungasitsigisumiittumi saffiugassanik qaqutigoortunik piiaanissaanut akerliuvoq.
Saffiugassat qaqutigoortut oqarasuaatinut angallattakkanut anorisaatinullu atortussiassaliarineqartarput. Saffiugassanilli qaqutigoortunik piiaalersaarneq uranimik saniatigut piiaalersaarfiummat akerleriiffiuvoq.
AAMMA ATUARUK IA Nalerarlu Naalakkersuisut tullissaanik ilusiliissasut
Kuannersuarni aatsitassarsiulersaarneq juunip aallaqqaataanut tusarniaassutigineqaleruttorpoq.
Naalakkersuisunngortut isumaqatigiissutaanni ersarissumik ima allaqqavoq: Naalakkersuisunngortussat nunatsinni uranisiornermik inerteqquteqarnissaq isumaqatigiissutigaat. Kuannersuarni aatsitassarsiulersaarneq taamaatissaaq. Radioaktiviusunilk qinngulanilinnik aatsitassarsiornermik inerteqquteqarnermut inatsiseqalernissaq qinigaaffimmi uani suliniutigissavarput.
Meeqqqanut inuusuttunullu naalakkersuisoq
IA Nalerarlu isumaginninnermi aamma allannguipput. Assersuutigalugu meeqqanut inuusuttunullu naalakkersuisoqalerpoq. Rena Langellu tamanna nuannaarutigaa:
- Ukua nutaat isertut assut isumalluarnarput. Taavalu una aamma nuannequtigigamiuk meeqqaniit inuusuttuaqqanut Naalakkersusioqalernera, isumalluarnaqaaq aamma tassuunaatigut.
Makka Titussen aamma isumaqataaqqippoq:
- Isumaginninnerup tungaatigut allannguisoqarnissaa pisariaqartorujussuuvoq, utoqqarnut inuusuttunut innarluutilinnullu. Inatsisiliuunneqarnissaat neriuutigisorujussuuara, ajorami ingerlatsineq maani Kujataani utoqqarnut innarluutilinnullu.
Aalisartoq, Jens Enok Hansen, naalakkersuisunngortunut aamma isumalluaqaaq.
![](/sites/default/files/styles/image_934x467/public/qaqm.jpg?itok=uvHBwwv8)
- Aalisarnerup tungaatigut siuarsaaqataarusunneq ingerlakkusukkatsigu, soorlu aningaasarsiornikkut iluamik patajaatsumik ingerlatseqataarusukkatta, taava neriuppugut ajunngilluinnartumik arlaatigut sunniuteqassasut maani Kujataani aamma Naalakkersuisunngortitsisut.
Naalakkersuisunngortussat Inatsisartunit tallimanngorpat pisortatigoortumik akuerineqassapput.