Narsarsuarmi innuttaasoq ataatsimiititsereernermi: Quleriarlunga aperisinnaagaluarpunga
Greenland Mineralsip Kuannersuarni aatsitassarsiorusulluni suliniutaa pillugu kujataani innuttaasunik ataatsimiititsinissani tallimaasuni siulleq Narsarsuarmi ippassaq tallimanngornermi pivoq.
Innuttaasut 40-it missaanniittut peqataapput.
Narsarsuarmi najugallip, Amos Ezekiassenip, innuttaasunut ataatsimiititsineq naammassimmat paasisaqarnerulerpallaanngikkaluarluni ataatsimiitinneqarnertik nuannaarutigaa.
Kuannersuarnili aatsitassarsiorusuttut pisortaannut, John Mair-imut, Australiamit attaveqaatitigut toqqaannartumik peqataasumut, pujoralaat pillugit apeqqummi akissutaa naammagisimaarnagu.
- Paasinikuusakka uteqqinneqarput, aamma nassuiaatigineqartut tamakkiisumik anninneqanngissorivakka, Amos Ezekiassen KNR-imut taama oqarpoq.
Ulrik Plesner aamma ataatsimiititsinermut peqataavoq. Taassuma peqataatinneqarnertik naammagisimaaraluarlugu innuttaasut marluinnarnik apeqquteqaqqusaanerat tupaallatigaa.
- Quleriarlunga aperisinnaagaluarpunga. Taamaammat apeqqutissaraluakka tusarniaanermut akiffissiamut nassiutiinnartariaqassavakka, Ulrik Plesner KNR-imut taama oqarpoq.
AAMMA ATUARUK Innuttaasunik ataatsimiititsinermi Kuannersuarni suliuniutip ernumassutigineqarnera malunnartoq
Inga: Illugiilluni oqaloqatigiittoqanngilaq
Inga Gisladottir, ataatsimiititsinerup aaqqissuunneqarneranut isornartorsiuineruvoq.
- Aatsitassarsioqatigiiffimmiit naalakkersuisoqarfinniillu saqqummiussineruvoq taakkuninnga apeqquteqarfiusinnaasoq. Illugiilluni oqaloqatigiittoqanngilaq innuttaasullu saqqummiussinatik. Isummatta anninnissaanut periarfissaqanngilaq aperiinnarsinnaavugut, Inga Gisladottir KNR-imut oqarpoq.
Corona peqqutaalluni inimut ataatsimiiffiusumut isersinnaasunik killilersuisoqarpoq. Narsarsuarmi innuttaasuni 120-it missaanniittuni 40-it missaat ataatsimiititsinermi peqataapput, tamarmilli inissaqannginnamik ataatsimiigiat ilaat inip ataatsimiiffiusup silataani tusarnaaginnarput.
AAMMA ATUARUK Urani Naamik Narsarsuarmi nipaatsumik akerliussutsimik takutitsisoq
Innuttaasunik ataatsimiititsinerni siullerni Naalakkersuisut peqataaniaratik aalajangernikuupput. Tamanna uggornartuusoq Amos Ezekiassen isumaqarpoq.
- Peqataasoqannginnera uggornarpoq. Isumaqaraluarpunga inuiaqatigiit taamak navianartiginngittugut, pisariaqavikkaluarpoq maannakkut killiffik taama immat.
Amos Ezekiassen taama oqarpoq.
Qassiarsummi ullumikkut Igalikumilu aqagu ataatsimiititsinissaq anorersuarnissaa peqqutigalugu taamaatiinnarneqartut, Naalakkersuisut ippassaq nalunaaput.
Innuttaasunik ataatsimiititsinerit Qaqortumi ataasinngorpat Narsamilu marlunngorpat KNR TV-p toqqaannartumik aallakaatissavai.
Innuttaasunut ataatsimiititsinissamut piffissat sumiiffissallu uani ataani takusinnaavatit: