FN: Nunarsuaq 2020-mi kiangaatsiartoq

Silap kiannerpaaffiini uuttorneqarsimasut pingasut ilaat ataaseq ukioq manna uuttortarneqartoq, Naalagaaffiit Peqatigiit pingasunngornermi ilisimatitsipput. Tamanna nunarsuaq silap pissusiata allanngoriartornerani ajunaarnissarsuup killinganiittoq, Naalagaffiit Peqatigiit qullersaata Antonio Guterresip aarlerisaarutigaa.

Nunarsuarmi 2020-mi silap pissusia pillugu nalunaarusiaagallartumi, silap kiattarneranik nillertarneranillu 1850-mi uuttortaasoqartalermalli, ukiut kingulliit tassa, 2015- imit 2020-mut kiannerpaasimasoq, Naalagaaffiit Peqatigiinni silasiortut nunarsuaq tamakkerlugu suliniaqatigiiffiat WMO nalunaarpoq.

AAMMA ATUARUK Ilisimatuut mianersoqqusipput: Nunarsuarmi inuit pingajorarterutaat ajornartorsiulersinnaapput

Qarsutsinerit, ulussaarsuartarnerit anorersuarujussuartarnerit ikuallannerujussuillu nalinginnaaleraluttuinnartut, Guterres oqarpoq.

Taanna nunarsuaq pillugu New Yorkimi Columbia Universitetimi pingasunngornermi oqalugiarpoq.

- Nunarsuarmiut pinngortitaq akiorpaat. Tamanna imminornertut taaneqarsinnaavoq. Pinngortitaq qisuariartuaannarpoq, sakkortusiartuinnavittumillu taamaalereerluni, Naalagaaffiit Peqatigiit qullersaat ilanngullugu oqarpoq.

Silaannarmik kissatsitsiartortartumik aniatitsineq silaannaap kiatsikkiartorneranut pissutaanerpaavoq.

Ukioq kingulleq qiviaraanni CO2-mik aniatsitsineq annertoorujussuuvoq, tamannalu 2020-mi suli qaffakkiartorsimavoq, naak nunarsuaq tamakkerlugu coronavirusimik tunillaassuuttoqaraluartoq.

AAMMA ATUARUK Nunarsuup imaa ukiut 80-it qaangiuppata centimeterinik qulinik qaffassinnaasoq

Nunarsuaq tamakkerlugu tunillaassuunneq CO2-mik aniatitsinermik 4,2-p 7,5-illu akornanni ukiumoortumik appariarsimavoq. CO2-li ukiorpassuarni silaannarmiinnera aniatitsinerup nunarsuaq tamakkerlugu tunillaassuunnerup kinguneranik annikillinera taamaammat isumaqanngilaq.

Ukioq mannamut nalunaarusiaq aappaagu marsip qaammataani naammasineqassangatinneqarpoq.

- Silarsuarmut aaqqiissutissamik peqanngilaq, Guterres oqarpoq.