Ilisimatuut mianersoqqusipput: Nunarsuarmi inuit pingajorarterutaat ajornartorsiulersinnaapput
Immikkut ilisimasallit nunanit tamalaaneersut misissuineranni taama inerniliisoqarpoq. Immikkut ilisimasallit Aarhus Universitetimeersut taakkununnga ilaapput.
Inuit milliardilikkaat coronap ajornartoortitsinera pissutigalugu angerlarsimaannaqquneqartut, gassinik silaannarmik kianneruleriartortitsisunik aniatitsineq millisinngikkutsigu ajornartoornerit maannamut misigisimanngisagut allat ajornartorsiutigilissagivut immikkut ilisimasallit oqaatigaaat.
AAMMA ATUARUK Naalagaaffiit Peqatigiit silap pissusia pillugu ataatsimeersuarnissaraluat kinguartinneqartoq
Silap pissusianik immikkut ilisimasallit USA-meersut, Kinameersut Europameersullu misissuinermi inerniliatik atuagassiami PNAS-imi saqqummersippaat.
Maanna ineriartornerit eqqarsaatigalugit immikkut ilisimasallit silap pissusianik siulittuuteqarput, inuillu amerlassusaat eqqarsaatigalugit eqqoriarpaat inuit 3 milliardinit amerlanerusut inoqajuitsup Saharap qiterpasissuani agguaqatigiissillugu 29 gradinik kiattarneratut kiatsigisumi 2070-imi najugaqassasut.
- Inuit 3,5 milliardit pissutsit ajorluinnartut misigisassavaat, Jens-Christian Svenning oqarpoq.
Neriuutissaqarnerarpaali aamma:
- CO2-mik aniatitsinerit annikilliartortipallakkutsigit inuit kiattarneranik ajornartorsiortut ikiliartortissinnaavagut, taanna oqarpoq.
- Pissutsilli pitsaanerpaaffianni ittunik siulittuigaluaruttaluunniit inuit 1 milliardit najugaqarfitsik agguaqatigiissillugu 29 gradinik kiattoq kiannerusorluunniit 2070-imi misigisassavaat, Jens-Christian Svenning oqarpoq.
