Aalisarnermut ataatsimiititaliap avaleraasartuunut pisassiissutinik tunisinermi toqqammaviit paaserusuppaa

Avaleraasartuunut pisassiissutit 85.000 tonsiusut agguarneqarnerannut toqqammavii, aalisarnermut naalakkersuisoqarfiup erseqqissumik Inatsisartut aalisarnermut ataatsimiititaliaanut saqqummiuttariaqaraluarai, aalisarnermut ataatsimiitsitaliami amerlanerussuteqartut isumaqartut, ataatsimiisitaliap siulittaasua Nikolaj Jeremiassen oqarpoq.

Allattoq Ivik Kristiansen, Laura Aggernæs

juunip 12-at 2015 14:10

- Tassa soorlu oqartugut, Naalakkersuisut pisussaaffitik malillugu agguaassipput, kisianniuna toqqammavigineqartut suunersut erseqqarissumik ataatsimiititaliap paaserusukkai. Nikolaj Jeremiassen oqarpoq, nangillunilu.

- Tassa taakkununnga paasissutissat erseqqissut pissarsiarinikuugaluarpagut sivitsuuttumik. Ilaatigut sapaatip akunneri pingasut angulerpai, suli erseqqissumik akineqarnata.

Aamma atuaruk Avaleraasartoortassiissutigineqartut pillugit akissutissanik Aalisarnermut ataatsimiititaliaq ujartuisoq

Aalisarnermut Naalakkersuisoqarfik tusagassiuutinut ullut qulit qaangiummata nalunaaruteqarpoq, tassanilu avaleraasartuunut pisassiissutinik agguaanermi toqqammaviit ilaatigut erseqqissarneqarput.

Taamaakkaluartoq aalisarnermut ataatsimiitsitaliap suli paasisaqarusupput.

- Taanna naammagineqarsinnaavoq, kisianni soorunami kinaluunniit pisinnaatitaaffeqarpoq qanorluunniit iliuuseqassalluni.

Nikolaj Jeremiassen taama oqarpoq.

KNR-ip aalisarnermut naalakkersuisoqarfiup pisortaa Jørgen Isak Olsen tallimanngornermi ullaakkut oqaaseqartinniarsimagaluarpaa, ataatsimiinnerali pissutaalluni oqaaseqartissinnaasimanagu.