Aalisarneq pillugu ataatsimiititaliarsuaq innuttaasunik oqaloqateqarnissamut piareertoq
Ataatsimiititaliarsuup suliani 2020-mi juunip qaammataani saqqummiuttussaavaa. Suliartilli pillugu tamanut maanna saqqummersitsisinnaalereerput.
Aalisarneq pillugu ataatsimiititaliarsuup maannamut suliarisimasat, innersuussutit tunngavigisallu piffissamut matumunnga anguneqarsimasut saqqummersikkiartorlugit pingasunngornermi sisamnngornermilu angalassaaq.
Tamanna pillugu Naalakkersuisut, Inatsisartut tusagassiorfiillu ukiup affaani kingullermi suliarineqarsimasut pillugit paasisaqarnissamut periarfissaqassapput. Innuttaasullu sisamanngornermi paasissutissiiffigineqassallutik.
- Maannamut suut angusimanerlutigit innuttaasunut takutikkusupparput, aammali tunngaviit innersuussutillu saqqummersitagut oqallisigerusullutigit, ataatsimiititaliarsuarmi siulittaasoq, Eqqartuussissuserisoq, Jens Paulsen oqarpoq.
AAMMA ATUARUK Nu er fiskerikommissionen trukket i arbejdstøjet
Taassuma innersuussutit tunngaviillu saqqummersinneqartut ataavartussatut pilersinneqariinngitsut erseqqissaatigaa.
- Utaqqiisaarutaapput oqallisigisassaallutillu. Oqallisiginninnerit innuttaasunilu oqallinnerusinnaasut suliatta ingerlaqqinnissaanut atorneqarnissaat siunertaavoq, Jens Paulsen oqarpoq.
Innuttaasut suliamut nutaanik isumassarsititsinissaat neriuutigigaa
Ataatsimiititaliarsuaq apeqqutinik aalajangersimasunik assigiinngitsunik aalajangiiffigisassaminik tunineqarnikuuvoq, tamatumalu saniatigut sammisat allat aalisarnermut inatsisissamut naleqqussinnaasut aamma ilanngussinnaallunigit.
AAMMA ATUARUK Medlemmerne af fiskerikommissionen er fundet
Taakkulua inernerigallagaasa innuttaasunut avitseqatigiissutiginissaat siulittaasup qilanaaraa.
- Innuttaasut sisamanngorpat oqallisigeqatigilluarnissaat neriuutigaarput. Tassa innuttaasut ataatsimiititaliarsuarmi suliatsinnik soqutiginnittut eqqarsaatigisimasatsinnillu tusagaqarusuttut innersuussutinillu angusimasatsinnik oqallisiginneqataarusussinnaasut.
Ataatsimiititaliarsuup siulittaasuata aaqqissuussineq angerlarsimaffinni politikerillu akornanni oqallitsitsilersinnaassasoq, aammali ataatsimiitaliarsuaq suliaqaqqinnissamut nutaanik isumassarsisinneqarsinnaanissaa neriuutigaa.
Inatsit pisoqaallunilu allannguutinik ulikkaartoq
Aalisarneq pillugu inatsit maanna atuuttoq 1996-imeersuuvoq, tassanilu ilassutinik atorunnaarsitsisunilluunniit kisissaanngitsunik allannguuteqarlunilu ilassuteqarpoq
Aalisarnermut ataatsimiititaliarsuarmi siulittaasup saniatigut SIK-mit, Pinngortitaleriffimmit, KNAPK-mit, SQAPK-mit, GE-mit, NUSUKA-mit, Kukkunersiuisartunit qulinik ilaasortaqarpoq kiisalu nakerisarsiunngitsunik pingasunik ilaasortaqarluni.
Aalisarneq pillugu Isumalioqatigiissitap oqallisissiaanik saqqummiussineq Nuummi Hotel Hans Egede-mi ulloq 12. december nal. 16.30-18.00 aallartissaaq.