Aalisarnermut ataatsimiititaliarsuaq ataatsimeerngaartoq
Aalisarnermut Ataatsimiititaliarsuup sulinissaanut tunngavissat aalajangersaaffigineqartut oqallisigineqarput, soorlu aamma Aalisarnermut Ataatsimiititaliarsuup sulinissaanut anguniagassatut suliakkiutaasut oqaluuserineqartut.
- Siullermeerluni ataatsimiinneq ajunngitsumik anersaaqarluni ingerlanneqartoq naammagisimaaqaara, nuannaaqaanga sulilluta aallartikkatta, siullermillu ataatsimiinneq isumalluarnarpoq, Aalisarnermut Ataatsimiititaliarsuup siulittaasua Jens Paulsen oqarpoq.
Ataatsimiititaliarsuaq aalisarneq pillugu inatsisip misissuiffiginissaanut siunnersuutinik suliaqaqqullugu peqquneqarpoq, siunnersuutillu aalisarnermi ineriartornissamut periarfissat pitsaanerulernissaannut aamma inuiaqatigiit aalisarnermik inuussutissarsiuteqarnermik pisuussutinillu annerpaamik iluaquteqalernissaat anguniagaalluni.
Ataatsimiititaliarsuaq suleriaasissamik sammisassallu suliarinissaannut piffissaliunneqarallartumik akuersissuteqarpoq, sammisassallu isumaliutissiissummut ataatsimiititaliarsuup 2020-mi juunimi sulineranut naammassineqartussamut tunngavittut atorneqassapput.
- Suliassaq annertooq imaannaanngitsorlu aallartissimagipput ilisimaneqarpoq, taamaattorli sulinissatsinnut tunngavissavut aalajangerneqareerput, aallartilluareerpugullu, Aalisarnermut ataatsimiititaliarsuarmi siulittaasup tullia, Peder Andersen oqarpoq.
Naalakkersuisut nittartagaanni tamanna allaaserineqarpoq.