Finn KNAPK-mut: aqunneqanngilanga

Naalakkersuisoqarfimmiilli oqaatigineqarpoq, Naalakkersuisut pisassanik agguaassisartut. Naalakkersuisorli Finn Karlsen naalatsitaannartut unnerluutigineqarnini iluarinngilaa.

Naalakkersuisoqarfiilli KNAPK politiinut unnerluutigissallugu eqqarsaateqarput. Taamaaliortoqarniarli, KNAPK siulittaasuata oqaatigaa.

Avaleraasartoorniarusuttut pisassanik qinnuteqartut 37-it, aqqaneq marluinnaallu akuerisaasut.

Akuerisaannginnerit kinguneraat, Naalakkersuisoqarfimmi savalimmiormiut islandermiullu sulisut atorfitsik atornerlullugu nunaqqatitik pisassaannik tuniornerarlugit KNAPK-p unnerluutigigai.

KNAPK-p pisassanut tunioraasunut takussutissiamik namminneq sanasimapput, Finn Karlsenillu unnerluutiginninerit pillugit niaqquni ileqimisaaginnarpaa:

- Tassa ingerlaannaq akissavara taanna eqqortuunngilluinnaqqissaarpoq, taamaattoqaanngiivippoq, Aalisarnermut Naalakkersuisuugallartoq Finn Karlsen oqarpoq.

Taassuma nunanit allaneersut atorfilittat nunaqqatai pisassillugit atorfilittanit uukapaatinneqarneragaanini ilumuunnginnerarpaa.

Aalisarnermut Naalakkersuisoqarfiup oqaatigineqartoq kanngunarsaanerarpaa taannalu pillugu KNAPK politiinut unnerluutissallugu maanna eqqarsaatigalugu, Jørgen Isak Olsen Naalakkersuisoqarfimmi pisortap tusagassiuutinut allagaqaammini erseqqissarpaa.

Siorasaarinelu KNAPK-mit tupaallaataanngilaq.

- Unnerluutiginninnissamik oqaluttoqarnera namminermini uagut tupaallaatiginngivipparput. Taava eqqortoq qulaajarlugu misissorluarneqarniassaaq, aamma ajunngilaq taamaaliortoqarniaruni taamaaliortoqarniarli, Aalisartut piniartullu kattuffiani KNAPK-mi siulittaasoq, Henrik Sandgreen oqarpoq.

Naalakkersuisulli naqissuserusuppaa, atorfilittat pisassiineq ajortut Naalakkersuisulli kisimiillutik avaleraasartuunik pisassiisartut.

- Sulisut Naalakkersuisunut naalakkiineq ajorput pinngitsaaliineq ajorput imaasiortoqarnissaannik, kisianni inatsisit malillugit siunnersuisoqartarpoq, inatsisit unioqqutinneqanngillat ataatsimilluunniit, Finn Karlsen oqarpoq.

Henrik Sandgreenilu allatut isumaqarpoq, tassa Finn Karlsen atorfilittanit aqunneqartoq.

- Atorfilittat pappiaqqatigut sulinerminni innersuussutigisassasut saqqummiussaat taakkua tunngavigalugit naalakkersuisut aalajangertarnissaat ilimagilluinnaqqissaarpara. Taamaammat taamatut isummernerput, suleriaatsinik ilisimasaqarnermut tunngaveqarpoq. Taanna assortuussutigisinnaavarput, Henrik Sandgreen taama oqarpoq.