Filmimi ersinartulersaarummi Ikusimmarik aallaavigineqarporlusooq

Kammagiit inuusuttut, Miniup Hansillu susassaaleqinerminni immikkut ittumik misigisaqarusulerput, illulu inigineqarusukkunnaarsimasoq unnuiffiginiarlugu aalajangerlutik.

Illu unnuiffiginiagaat aliortuaqartartoq allanillu tupinnartunik misigisaqarfigineqartartoq uppernarsiniarlugu, Minik Hansilu unnuiartorput filmiliuserlutik.

Ersinartulersaarummi 'Unnuap Taarnerpaaffiani', kalaallit oqaluttuaatitoqaannit isumassarsiaq ilanngunneqarpoq, tassalu Ikusimmarimmik oqluttuatoqaq aallaavigineqarlunilusooq ersinartulersaarut suliarineqarsimalluni.

Minik Hansilu illumut iseramik paasilerpaat kisimiinnatik. Tassalu ersinersuaq aallartilluni.

Ersinartulersaarummut isiginnaariat ilagaat, filmiliortartoq Inuk Silis Høegh. Taanna aperaarput filmi qanoq igineraa, Inuk Silis Høeghilu ima akivoq.

- Uanga nuannaraara isiginnaartitsisartut imatut ingasaannagu isiginnaartitsinerat, tamannalu nuannerpoq.

Inuk Silis Høeghip oqaatigaa, filmiliornermi aningaasat atorneqartut ikittuaraagaluartut taamaattoq isiginnaartut soqutigisaarutinnginnissaat mianersuunneqartariaqartoq.

- Filmiliornermi isiginnaagassaq upperiuminaatsuugaagat isiginnaartut soqutigisaaruttarput, tamannalu mianersuutassaavoq. Taamaattumik kissaatiginarpoq filmiliornermik pikkorissuseqartut aningaasatigut pitsaanerusumik periarfissinneqartarnisaat, taamaasillutik filmip iluamik inerneqarnissaa anguneqassammat, Inuk Silis Høegh oqarpoq.

Allap filmeriaqataasup, assiliisartup Kunuk Brønsip ersinartulersaarut ima oqaluttuaraa.

- Ilimagisannit ajunnginneroqaaq aamma nipitalersornera inuttaasalu isiginnaartitsilluarneri sjunngipput.

Assiliisartoq, Kunuk Brøns taama oqarpoq.

Ersinartulersaarut 'Unnuap Taarnerpaaffiani'  Nuummi Ilulissanilu ippasaq unnukkumiit isiginnaarneqarsinnaalerpoq. Sisimiuni siullermik takuteqqaarneqassaaq novembarip 27-anni.