Filmiliortartup Donald Trump Adolf Hitlerimut assersuukkaa
Filmiliortartup USA-meersup Michael Moorep filmiliami kingullermi "Fahrenheit 11/9"-imi, USA-p præsidentia Donald Trump Adolf Hitlerimut sanilliuppaa.
Filmi piviusulersaarusiaq Canadami Toronto International Film Festivalimi ippassaq takuteqqaarneqarpoq.
Nukiit Donald Trumpip præsidentitut 2016-imi novembarimi qinigaaneranut tunuliaqutaasut, Moorep filmiliamini takutinniarsarai. Trumpillu qinigaanera, Hitlerip Tysklandimi 1930-kkunni pissaaneqaleriartorneranut sanilliuppaa.
Trumpip oqalugiartarneranit assit, Hitlerillu inuppassuit katersuunneranni oqalugiartarneranit assit uteqattaarpai, oqaluttuarisaanermillu ilisimatusarsimasup angutit pissaanilissuit pissaaneqaleraluttuinnarnerat pillugu oqaluttuarnera aamma tusaaneqarsinnaalluni.