Filmiliassartik aningaasassarsiuukkaat

Filmiliornermi ilitsersuisartoq Aka Hansen aamma Marie Møller, filmimik siunissamut takorluukkersaarummik tallimanik immikkoortortalimmik POLAR-imik taguuteqartussamik suliniuteqarput. Taakku Københavnimi filmiliornermik ilinniarfimmi Super16-imi ilinniartuupput.

Nangeqattaartuliami kalaallit inuusuttut nipimik eqqumiitsumik qunusiarineqarnerat sammineqassaaq. Anguteqatiminoortup inuusuttup, Iviup, ikinngutaatalu danskip Davidip paaseriasaarpaat kammalaatiminnut naleqqiullutik nipimik amiilaarnartumik naalliuteqannginnerullutik.

Taamaammat nipip eqqumiitsup suminngaanneernera suuneralu ikinngutigiit paasinialerpaat.

AAMMA ATUARUK Inuusuttunut nangeqattaartuliamik Nuummi immiussilersut

- Nuup kalaallillu kulturiata ilisimasaqarfiginerulernissaat kissaatigaara. Danmarkimi maanna ilinniarfigisanni amigaatigineqarpoq. Taamaammat filminik nangeqattaartuliap Nunatta Danmarkillu akornanni ataqatigiissitsisinnaanissaa neriuutigaara, Aka Hansen taama oqarpoq.

Aka Hansenip Nunatsinni filmilianik nuannarineqarluartut Qaqqat Alannguanik aamma Hinnarik Sinnattunilu siornatigut suliarisimavai, nangeqattaartuliassallu POLAR-ip immikkoortuata siulliup misiligutitut immiunnissaanut maanna aningaasassarsiorpoq.

Tamanna aningaasanik katersuisarfik Kickstarter atorlugu ingerlanneqarpoq. Kikkulluunniit piumasut periarfissaqartullu suliniummut tapiisinnaapput.

Nuummi maajip qaammataani misiligutissap immiunnissaanut aningaasartuutissat matussusernissaannut 90.000 koruuninik katersinissaq anguniagaavoq.