VIDEO Filmeeqqani ilinniartut nunatsinnit nuunnerminni misigisalikkersaarput

"Uninnak - Sungiussiartuaarit" Kalaallit Danmarkimi ilinniartut ilinniakkaminnik naammassisarnissaannut anguniagaqarluni sulissuteqarneq nutaaq taama qulequtserneqarsimavoq.

Sulissuteqartut tassaapput Københavnimi Kalaallit Illuutaat filmiliornermillu ingerlatsivik Ánorâk Film, Namminersorlutik Oqartussat aningaasaliinerisigut filmeeqqanik pingasunik filmiliorsimapput. Filmiliaaqqani kalaallit Danmarkimi ilinniartut oqaluttuartinneqarput, ilaatigut Danmarkimut ilinniariarluni nuunneq ilinniakkamillu aallartitsineq pillugu oqaluttuartinneqarlutik.

Filmiliaaqqat misigissutsinut tunngapput. Misigissutsimmi soorlu, kulturikkut tupatsitaaneq, kiserliorneq angerlarsernerlu kalaallit Danmarkimi ilinniartut uniinnartarnerannut nunatsinnullu utiinnartarnerannut pissutaanerpaammata.

Aamma atuaruk Kalaallit Illuini pisortat: Inuusuttuaqqat ilinniartut danskit oqaasiinut pikkorlupput

Piareeqqavallaaratik aallartartut

Filmiliornermi ingerlatsisoq, Jakob Søvndahl Skovaa, nammineerluni Nuummiit Københavnimut ilinniariarluni aallarnikoq ima nassuiaavoq:

- Kalaallit atuariartut amerlasuut tusarsimavagut immaqa piareeqqasimavallaarnatik atuariartortarsimasut aallariartorlutik.

- Kisianni soorunami Kalaallit Illuaninngaanniit aamma immaqa Piareersarfimminngaanniit piareersarneqartarput kalaallit atuariartortut, soorlu qanoq adressimik allanngortitsisinnaappat, atuakkat akeqartarput, tamakku assigiinngitsut soorlu misigissutsimut tunnganngitsut.

- Kisianni uku filmeeqqat misigissutsimut tunnganerupput, soorlu angerlarsernermut, qallunaat akornanni qanoq pissuseqarnissaq imaluunniit soorlu tamakkua iserfigineruaat, Jakob Søvndahl Skovaa taama KNR-imut oqarpoq.

Filmiliaaqqat ilinniarnertuunngorniarfinni tamani Piareersarfinnilu tamani takutinneqassapput sisamanngorpamiillu KNR TV-ikkut takutinneqassallutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat