Filippineri Ghanameersorlu pavenngortussatut piukkunneqarnerpaani taaneqartut
Pave Fransip toqunerata kingunerisaanik kiap taarsissaneraa eqqarsaatersuuteqarnerit aallartipput.
Nunani tamalaani tusagassiorfiit soorlu, Reuters, AFP, Al Jazeera kiisalu tuluit tusagassiorfiat The Guardian piukkunnarnerpaanik eqqoriaapput.
Allattorsimaffinni tamani 67-inik ukiulik, filippineri, kardinal Luis Antonio Gokin Tagle aamma Ghanamiu kardinal Peter Turkson nassaassaapput.
Filippinerit Pave Fransiat
Luis Antonio Gokim Tagle "kangiamiut pave Fransiatut" Reutersimit nassuiaatigineqarpoq, tamanna tusagassiorfik naapertorlugu taanna inuiaqatigiinni naapertuilluarnissamut aamma tunniusimaneranik pissuteqarpoq.
Taanna pave Fransimit filippinerit illoqarfiisa pingaarnersaannit, Manilamit Vatikanimut nuutsinneqarluni misilittagaqalerniaassammat ajoqersuinermut immikkoortortami aqutsisunngortinneqarpoq.
Afrikami Ghanameersoq, Turkson katuullit oqaluffiisa kardinaliini sunniuteqarnerpaanut ilaasoq, AFP allappoq.
Taanna piukkunneqartunut ilaavoq, naak taassuma pavenngorusunnani 2010-mi oqaatigereersimagaluaraa, nutaarsiassaqartitsivik allappoq.
The Guardian naapertorlugu taassuma silap pissianik ilungersuaneq piitsuunerlu immikkut isiginiarnikuuai.
Allattorsimaffinni Maltameersoq, Mario Grech, italimiut Matteo Maria Zuppi aamma Pietro Parolin kiisalu unganiu Peter Ergo aamma takussaapput.
Pavemik nutaamik ima toqqaasoqartartoq
Katuullit oqaluffiinut qullersamik nutaamik toqqaaneq Vatikanimi konklavemi Det Sixtinske Kapelimi pisarpoq. Konklave "ini matoqqasumik" isumaqarpoq.
Tassani kardinalit nunarsuarmi tamarmeersut katersuuttarput.
Pavemik nutaamik qinersinissaq aallartippat pavemik toqqaasoqartinnagu kardinalit tamanut saqqummeqqissanngillat.
Pisariaqartunik pingajorarterutaanik amerlanerussuteqartoqanngikkuni qinersinermut kortii akoorutissamik kemikalielerlugit kissarsuummut ikineqassapput, tamannalu qernertumik pujortitsissaaq.
Amerlanerussuteqartoqaruni pavemillu nutaamik toqqaasoqaruni qinersinermut kortit akoorutissamik qaqortumik pujuliortitsisartumik ikuallanneqassapput. Pujoq Det Sixtinske Kapelip pujoorfiatigut anillatsinneqartarpoq.
