Fidel Castro toquvoq
Cubap præsidenterisimasaa Fidel Castro toqukkut qimaguppoq. Cubap nalunaaqutaa malillugu unnukkut arfineq-marlunut toqusoq, qatanngutaasoq Raul Castro paasissutissiivoq.
Nutaarsiassaqartitsiviit AFP Reutersilu Cubap tv-anit issuaallutik taama allaaserisaqarput.
Cubap naalagaaffianik aqutsisuusimasup mumisitsisuusullu kissaataa malillugu timaa ikuallanneqassasoq, Raul Castro oqarpoq. Tamanna pissaaq arfininngornermi ullaakkut.
Fidel Castro 90-inik ukioqarluni toquvoq. Taanna 1950-ikkut naajartulerneranni mumisitsiniartuni siuttuuvoq, Cubalu kommunistinit aqunneqalersillugu.
Fidel Castrop peqqiilliornini pissutigalugu pissaanini qatanngutiminut Raulimut 2006-imi tunniuppaa. Taannali ukiut marluk qaangiuteriiginnartut tunuarpoq.
Fidel Castrop tamanut saqqummertarnera qaqutiguulersimavoq, aggustimili 90-iliinermini, peqqiillioraluaqaluni, Cubami tamanut saqqummerpoq.
/Ritzau/