FE: Russit timmisartuutaat malersuutit Kalaallit Nunaannut aarlerinarsinnaapput
Russit timmisartui malersuutit nunatta silaannaatigut timmisinnaapput sakkutooqarfiillu aarlerinartorsiortissinnaallugit Kinalu nunatsinni sunniuteqarniarsariinnassaaq.
Issittormi pissaanilissuit sammivaat nunallu inissisimanera USA-p, Kina-p Ruslandillu akornanni atassuteqarnermi pissanganartumiissaaq.
AAMMA ATUARUK Rusland: Timmisartuutigut malersuutit Kalaallit Nunaannukarnissaat annilaangassutigineqartariaqanngilaq
Illersornissaqarfiup isertortumik paasiniaasartuisa (FE) aarlerinartunik ukiumoortumik naliliineranni qulequttat ilaatigut tamakkuupput.
Isertortumik paasiniaasartut nalunaarusiami nunanit alanit Naalagaaffeqatigiit sillimaniarneranut soqutigisaanullu suut aarlerinarnersut erseqqissaatigaat. Isertortumik paasiniaasartut siorna nalunaarusiaanni nunarput pingaarnerpaami inissisimavoq. Ukioq manna aamma taama inissisimaqqippoq.
Aarlerinarsinnaasut Ruslandimit aarlerinartuuvoq. Russit apriilip qaammataani sungiusarnermik ingerlataqarput, tassanilu sakkutooqarfik Nagurskoye aallarfittut nutaatut atorneqarluni.
Tamanna danskit timmisartui nakkutilliisut russit timmisartuinit malersuutinit nunatta silaannaata eqqaani nunat assigiinngitsut akornanni silaannaani naapitsisinnaanissaannik isumaqarpoq. Piffissami ajornartorsiorfiusumi sakkutuut timmisartui imaaliallaannarlutik sakkutooqarfimmit nunatta silaannaanut ingerlaratarsinnaapput.
Rusland USA-lu Kalaallit Nunaanni
USA-mi naalakkersuisut nunatsinni inuiaqatigiinni suliniutinut 12,1 million dollarsit – tassa 83 millionit koruunit missaanniittut atorsinnaalersippaat.
Qaammatit marluk qaangiuttut USA-p sinniisoqarfini Nuummi ammaqqippaa, tassanilu diplomatit qassiiusut suliffeqartussaallutik.
Rusland Nuummi aningaasaligaanngitsumik sinniisoqalerusuttoq oktobarimi saqqummiunneqarpoq.
Sinniisoqarfimmi sulisussaq akissarsiaqartinneqassanngilaq, atorfimmi tassaniittut inuussutissarsiornermi ingerlataqartuukkajuttarput immaqaluunniit eqqartuussissuserisut, taakku naalagaaffiup allanut attaveqarneranut nunanulluunniit allanut niuerneranik suliaqartarput.
Taamani nunanut allanut tunngasunut naalakkersuisup, Steen Lyngep (D) nunarput suleqatiginninnissamut ammanerarpaa.
FE-mit nalunaarusiaq naapertorlugu timmisartut nunatta Norgellu akornanni umiarsuarnut sorsuutinut kippasissumiittunut nunatsinnilu sakkutooqarnermut, Pituffik ilanngullugu aarlerinartorsiortitsipput.
Isertortumik paasiniaasartut Ruslandip Naalagaaffeqatigiit iluanni isumaqatigiinngittoqassagaluarpat tamanna atorluarlugu avissaartuunnermik pilersitsiniarsinnaallunilu pissaanilissuit Issittumi inissisimanerat annertusarniarsinnaavaa.
Kinap sammineqarnera
Kina nunatsinnut piffissami sivisuumi ukkaktarinnissimasoq aamma takunngitsoorneqarsinnaanngilaq.
Isertortumik paasiniaasartut nalunaarusiaat naapertorlugu kinamiut suliffeqarfii naalagaaffimmit naalagaaffiunngitsumillu pigineqartut niuernermut ilisimatusarnermullu atatillugu nunatsinnik suleqatiginninnissamut soqutiginninnerminnik takutitsinikuupput.
Kinamiut suliffeqarfiisa politikkikkullu aaqqissuussinerup akornanni qanimut atassuteqarneq pissutigalugu kinamiut annertuumik aningaasaliinissaat aarlerinarsinnaasoq FE isumaqarpoq.
Aningaasaliinerit Kinamit nunatsinnut politikkikkut kimigiisertoqarneruleratarsinnaanera FE-mit aarlerineqarneranik tamanna pissuteqarpoq.
AAMMA ATUARUK Pissaanilissuit nunatsinni pissaaneqarniuunnerat aarlerinarnerpaalersoq
Kinap USA unammillertiginerpaavaa, Naalagaaffeqatigiillu Kinap Issittumut Kalaallit Nunaannullu soqutiginninnerulernera USA-mi iliuusissatut pilersaarusiamut aarlerinartoqartutut isigaat.
USA-p taamaammat Kinap Issittumi naligninnaasumik aamma Kalaallit Nunaanni sunniuteqarnera killilersimaarusuppaa.
Pissaanilissuit Issittumi pitsaanerpaamik inissisimaniarlutik suliniuteqangaatsiarniarnerannik takussutissaqangaatsiarpoq. FE-p ineriartorneq tamanna politikkikkut oqallinnermik sukannernerusumik sakkutooqarnermillu annertusaanermik pilersitsissasoq ilimanarluinnartippaa.
