Facebookimik atuineq kommuunip killilerpaa
Kristian Jeremiassen Siumumeersoq siunnersuuteqartuuvoq sulinerup nalaani Facebook-imik atuinerup killilersimaarnissaannik. Siunnersuut aningaasaqarnermut ataatsimiititaliami amerlanerussuteqartunit taperserneqarpoq. Maanna sulinerup annersaani Facebook-imik atuisinnaaneq ajornartitaalerpoq.
Facebook-mi atuisartut kommuunip internetimut attavii atorlugit Facebook-imut Youtube-imulluunniit aatsaat attavilersinnaapput ullup qeqqaanerani akunnerup affaa aamma ualikkut nalunaaqutaq pingasut kingorna.
Siunnersuut ukiarmi saqqummiunneqarput missingersuutit malissinnaajumallugit kommuuni sipaarniutissanik ujarlertariaqalermat.
- Taamaammat nittartakkat atorlugit naapittarfiit sulinerup nalaani iserfiginissaat ukiap ingerlanerani inerteqqutaalersissimavarput, borgmester Jess Svane KNR-imut oqarpoq.
Taamaakkaluartoq kommuunip kisitsisitalerlugu oqaatigisinnaanngilaa taamatut killilersuineq qanoq sipaaruteqarfiutigissanersoq.
- Nalunarpoq tassuunga sipaaruteqarsinnaanersugut. Sulisut suli periarfissaqarput internet atorlugu nutaarsiassanik atuarnissamut aallernissamullu, tamakkulu ilaatigut Facebook-imik atuinermiit akisunerusinnaasarput, Jess Svane oqarpoq.
