Facebook, Instagram Messengerilu atorsinnaajunnaarallartut
Nal. 15.00 nutarterneqarpoq. Facebook atorsinnaaleqqippoq, sunali peqqutigalugu ajutoornera paasineqanngilaq. Taakku atorsinnaaleqqinnerat Facebookip Instagrammilu namminneq pisortatigoortumik suli nalunaarutiginngilaat.
Internettikkut attaveqatigiittarfiit ulluinnarni atorluarneqartaqisut atorsinnaajunnaarnerat nunarsuarmi innuttaasut marlunngornermi misigaat.
Metap ingerlataasa Facebookip, Messengerip Instagrammillu atorsinnaajunnaarnerinik innuttaasut 100.000-likkuutaat nittartakkakkut Downdetectorimut nalunaaruteqarput.
Facebookip ajoquteqarneranik atuisut 360.000-ingajaat marlunngornermi ualikkut nalunaarput, Instagrammillu ajoquteqarneranik nalunaartut 56.000-init amerlanerullutik.
Taakkunannga atuisut iseqqisinnaaneq ajornertik nalunaarutigisarpaat. Internettikkut attaveqatigiittarfiit qaqugu atorneqaqqissinnaalernissaat sunalu ajoqutaanersoq suli ilisimaneqanngilaq.