Siusinaartumik sulisinnaajunnaarnersiutit misissuiffigineqartut
Sioqqutsilluni pensionisiaqartarnerup aaqqissuuteqqinneqarnerata ukioq manna juulip aallaqqaataani atuutilersinneqarnera siusinaarlutik pensionisiallit akornanni toqqissisimajunnaarsitsivoq.
Sioqqutsillutik pensionisiallit amerlasuut, pensionisiaqarunnaarnissartik paasisinnaanagu Innarluutillit Peqatigiiffiannut KNIP-mut saaffiginnittartut KNR-imi siusinnerusukkut oqaluttuarinikuuarput.
Paasissutissat
Siusinaartumik pensionisiallit pensionisiaminnik sooq annaasaqarsimanersut pillugu Naalakkersuisoqarfiup nassuiaataa:
Siusinaartumik pensionisiallit 151-it pineqartut siusinaartumik pensionisianik tunineqanngitsoornerat, siusinaartumik pensionisiallit namminerisamik aningaasarsiaqqortunerannik aamma/imaluunniit inoqutigiit aningaasarsiaqqortunerannik pissuteqarpoq. 151-it ilaasa 39-t inoqutigiinni aningaasarsiaat 500.000 kr.-init amerlanerupput. Taakku aaqqissuussineq nutaaq malillugu siusinnerusukkut siusinaartumik pensionisiarisinnaasamik 20 pct.-ii annaasussaavaat, taakkumi imminnut naammattumik pilersorsinnaassuseqartutut isigineqarput.
Sinnerisa 112-it inoqutigiinni aningaasarsiaat 149.383-it 500.000 kr.-illu akornannik amerlassuseqarput. Taakkunannga 42-t namminerisamik aningaasarsiaqannginnamik, aaqqissuussineq nutaaq naapertorlugu siusinaartumik pensionisiat qaffasinnerpaaffissaannik pisartagaqartussanngortitaassagunik aaqqissuussinermut nutaamut ikaarsaariarnermi tunniunneqartartut qaffasinnerpaaffissaasa 20 %-iannik pisartagaqarsinnaatitaassapput. Taamaammat innuttaasut taakku sulisinnaassusiannik nalilersueqqinnissaq kommuninit nukingiunneqartariaqarpoq.
151-it ilaasa 13-it inoqutigiinni aningaasarsiaat 250.000 kr.-init ikinnerupput. Taakku siusinaartumik pensionisiaasa kukkusumik naatsorsorneqarsimasinnaanerat misissorluarneqarpoq. Taamaattoqarsimanngilaq. Taakku siusinaartumik pensionisiaqartitsinermi ilaajunnaarnerat namminerisamik aningaasarsiaqqortunerannik taamaallaat pissuteqarpoq.
Siusinaartumik pensionisiallit taakku 13-it tassaapput aaqqissuussineq nutaaq malillugu kisermaat tallimat ikaarsaariarnermilu aaqqissuussineq malillugu kisermaat tallimat, kiisalu aaqqissuussineq nutaaq malillugu pingasut 60-ileereersimasut. Kisermaat taakku qulit namminerisamik aningaasarsiaqarput 153.185 kr.-it 249.643 kr.-illu akornannik amerlassusilinnik. Siusinaartumik pensionisiallit taakku qulit ilaat arfinillit namminerisamik aningaasarsiaat 200.000 kr.-init amerlanerupput. Siusinaartumik pensionisiallit 60-ileereersimasut pingasut pineqartut, aaqqissuussinermut nutaamut nuunneqartut namminerisamik aningaasarsiaqarput 151.787 kr.-it 186.485 kr.-illu akornannik amerlassuseqartunik. Tassa imaappoq tamarmik namminerisamik aningaasarsiaqarput imminnullu pilersorsinnaassuseqarlutik.
Aamma atuaruk Siusinaartumik pensionisiallit 2000-it nalilersuiffigineqarlersut
Siusinaartumik pensionisiallit 151-it pensionisiatik annaanikuuaat, suliallu taakkununnga tunngasut, Ilaqutariinnermut Naligiissitaanermut, Isumaginninnermut Inatsisinillu Atuutsitsinermut Naalakkersuisoqarfimmit maanna misissorneqarsimapput. Inuit Ataqatigiit sinnerlugit Inatsisartunut ilaasortap Mimi Karlsenip §37 naapertorlugu apeqquteqaataanut akissummi tamanna atuarneqarsinnaavoq.
- Siusinaartumik pensionisiallit 151-it pineqartut siusinaartumik pensionisianik tunineqanngitsoornerat, siusinaartumik pensionisiallit namminerisamik aningaasarsiaqqortunerannik pissuteqarpoq, Naalakkersuisoq Martha Lund Olsen, Mimi Karlsenip apeqquteqaataanut taama ilaatigut akissuteqarpoq.
Aamma atuaruk KNIPK: Siusinaartumik pensionisiat pillugit paatsuugasorpassuit
Siusinaartumik pensionisiallit 42-t pensionisiaminnik annaasaqarsimasut aaqqissuussinermut nutaamut ikaarsaariarnermi tunniunneqartartut qaffasinnerpaaffiissaasa 20 procentiannik pisartagaqarsinnaatitaassapput:
- Taamaammat innuttaasut taakku sulisinnaassusiannik nalilersueqqinnissaq kommuninit nukingiunneqartariaqarpoq, Naalakkersuisoq ilaatigut taama allappoq.
Siusinaartumik pensionisialinnik 60-it inorlugit ukiulinnik nalileeqqittarnissaq inatsit naapertorlugu ukiunut tallimanut naatsorsuussaasoq oqaatigineqarpoq:
- Taamaammat nalileeqqittarnissaq kinguaattoorfiunngilaq, Martha Lund Olsen oqarpoq.
