KNIPK: Siusinaartumik pensionisiat pillugit paatsuugasorpassuit

Siusinaartumik pensionisiallit pillugit juulip aallaqqaataanit aaqqissuussisoqarneratigut innuttaaasut amerlaqisut toqqissisimanngissuteqarlutik, innarluutillit kattuffiannut, KNIPK-mut saaffiginnittorpassuusimasut, innarluutillit kattuffianni siulittaasoq, Hans Reimer oqarpoq.
Assi © : KNR
juulip 13-at 2016 08:00
 

 

NAQQIUT 13.07.16 nal.14.30:

Siusinaartumi pensionisiallit aapparisaat 500.000 koruuninik akissarsiaqarsimappat aappaasup pisartakkani aatsaat annaassavai, imaanngitsoq 400.000 koruunit.

Siusinnaartumik pensionit pillugit kommunit pisartagaqarnersiutinik naatsorsuisalerput.

Siusinaartumik pensionisiallit 60-it ataallugit ukiullit sulisinnaassusaat nalilersuiffigineqartalissapput, tamatumalu malitsigisaanik aalajangersimasumik ukiut tallimat ingerlanerini nalilersuisoqartalissalluni. 

Malittarisassat nutaat
Malittarisassat nutaat naapertorlugit pisartakkat allanngortinneqarput.
Assersuutigalugu siusinaartumik pensionisiallip aapparisaa 500.000-it sinnerlugit akissarsiaqarsimappat taava pisartagariunnaassavai, pisartaqarnissamulli periarfissat tamaanga killinngillat, aappaasummi ukiumut akissarsiai apparsimappata, taava pineqartoq siusinnaartumik pensionisiaqarnissamut periarfissaqassaaq.

Namminersorlutik Oqartussat naatsorsuutigaat, siusinaartumik pisartagaqartut 317-it pisartagaqarunnaassasut.
KNR-imiillu sianeqattaarnermi inuit 151-it maannamut pisartagaarussimasut paasinarsivoq.

Kisitsisit

Siusinaartumik pensionisiaqartarunnaartut maannamut katillugit 151-iugallarput::

 

  • Kommeqarfik Sermersooq       35
  • Qeqqata Kommunea                  24
  • Qaasuitsup Kommunia              76
  • Kommune Kujalleq                      16

Siusinnaartumik pensionisiallit pisartagaat ikinnerpaaffilerneqarlutillu amerlanerpaaffilerneqarput. Pisartakkanilu amerlanerpaat ukiumut 110.000 koruunit missaanniipput.  

Naalakkersuisut isumaliutissiissutaanni naatsorsuutigineqarpoq, inuit 1.257-it amerlanerpaamik pisartagaqassasut, 359-it akunnattumik, 180-illu ikinnerpaamik pisartagaqalissasut.

Innuttaasut annerusumik paasissutissinniarlugit siusinnaartumik pensionisiaqartut pillugit sullissivik.gl-kkut atuarneqarsinnaasut, Isumaginninnermut naalakkersuisoqarfik ilsimatitsivoq.