Savalimmiuni tunillatsittut amerleriataarnerisa kingorna nutaanik killilersuuteqalerpoq

Tusagassiorfik Sermitsiaq naapertorlugu Savalimmiuni tusagassiuuteqarfik taamatut allappoq.

Atuarfiit imerniartarfiillu aamma annertuumik tunillaassuuffiit matunissaat aamma innersuussutigineqarpoq.

Tamanna naalakkersuisut innersuussutigaat. Innersuussutaallu novembarip 12-ata tungaanut atuuppoq.

Savalimmiuni lagmand, Bárdur Nielsen, naapertorlugu killilersuinerit nutaat atorlugit nunami nappatip tuniluunnerata nakkutigineqarsinnaalernissaa anguniarneqarpoq.

- Maannakkut killilersuutaasut naammanngillat. Taamaammat nualluutip tuniluunnera nakkutigisinnaalissagutsigu maanna iliuuseqarfigisariaqarpoq, Savalimmiuni Nutaarsiasseriviup allagaa naapertorlugu taanna taamatut oqarpoq.

Tamatuma saniatigut aamma novembarip 15-ianiit Savalimmiunukartut coronapassimik takutitsisariaqalissapput. Tassa akiuussutissamik kapitissimaneq imaluunniit misissortinnermi tunillatsissimannginneq uppernarsineqaqqaassaaq.

Tamanna aamma danskinut atuuttoq, lagmandip allaffia Ritzau-imut nalunaarpoq.

Savalimmiuni nualluutip tuniluunnera pillugu isumalioqatigiissitap aamma innersuussutigaa, coronapassi inuiaqatigiinni tamani atuutilissasoq. Taamatulli innersuussineq suli malinenqanngikkallarpoq.

2. novembari Savalimmiuni tunillatsittut nutaat 76-it nalunaarsorneqarput. Maannakkorpiaq Savalimmiuni tunillatsissimasut katillutik 729-upput.

Tamatumunnga atatillugu Savalimmiuni Nakorsaaneqarfiup kisitsisaataani takuneqarsinnaavoq, nualluutip tuniluutileqqaarneraniit 2288-it tunillatsissimasutut nalunaarsorneqarsimasut.

Savalimmiuni innuttaasut 75 procentingajaat akiuussutissamik kapitinnikuupput. Tassa kisitsisit naaperorlugit taakkua 40.000-iupput. Savalimmiuni 53.500-t missaat najugaqarput.

Savalimmiuni Nutaarsiassaqartitsivik naapertorlugu, nappaat 23. oktobari tuniluutilersimavoq. Tamatuma kinguninngua ingammik meeqqat inuusuttullu tunillatsittarsimapput.

Tamatuma malittaanik sumiiffinni tunillatsittoqarneruffinni atuarfiit matoorarneqarput. Taamani aamma tunillatsittoqarfiunerusuni sunngiffimmi aaqqissuussat killilersimaarneqarnissaat kaammatuutigineqarpoq.

Naalakkersuisut nappatip tuniluunnerata iliuuseqarfiginissaanut pissamaarpallaarsimanerat, Savalimmiuni politikkikkut illuatungiliuttut isornartorsiorpaat.