Kapisillit akianni savaateqarfeqalissasoq

Savat inaat siusinnerusukkut Neriunami savaateqarnermik misiliisut sananikuusaat atorneqassaaq.

Savat inaat savanut 400-nit 600-nut inissaqarpoq.

Angutimmarik Hansen Neriunami Kapisillit akianni 400-nik savaateqarnissani siunniupaa, savallu kujataanit Islandimiillu pisut aappaagu tikisinneqassapput.

Angutimmarik Hansen savaateqarneq aallartilluariarpat tunitsivissaminik qulakkeeriineereersimavoq.

- Aallartinngikkallarama qulakkeeqqaarpara savanik neqaanik tunisiffissaqarnissara,  tassalu isumaqatigissuteqarnikuuvunga, Nuummi Brugsen aamma Nuummi Pisiffik  savat neqaannik pisisussatut, Angutimmarik oqarpoq,
Kapisillit akianniittoq Neriunaq ukiut qulingingiluat matuma siorna savaateqarfittut matuneqarpoq,  taamanikkut savaateqarnermik ingerlatsisut savaatitik sumiginnarlugit savat 70-it toqummata kingorna pisortanit matuneqarluni.
Taamakkaluartoq Angutimmarik Hansen  savaateqarnermik misiliinissamut tunuarsimanngilaq.

- Neriunaq tikeqqaarakkuli savaateqrfissatut piukkunikuuvara, Nuummut ungasinnani, Nuummut toqqaannartumik pilersuisinnaaneq  piukkunaateqaqigami,  aamma Nuup kangerlua nunaleriffigissallugu piukkunaateqartukuluugami, Angutimmarik Hansen oqarpoq.

Savat Neriunamut aappaagu tikippata ivikkani nerisassaqarnissaannut maanna periareersartoqarpoq.

- Neriunami narsaat pioreersoq 14 hektariuvoq,  ukiormanna 5 hektar piareersarparput nunagissarlugu, ivigalersorlugulu.
Angutimmarik Hansen nuliani meeqqatillu marluk ukioq naallugu Neriunami najugaqassapput, taamaattorli savat toqorarneqalerangaata ikiorteqartassallutik.

- Siornatigut savaateqarsimasoq eqqaamioraarput, taannalu savat toqorarneranni savarniarnermi savalli piaqqiorneranni ikiortigisarumaarparput, Hansen oqarpoq.

Kujataani savaatillit eqqaamioqarlutik sungiusimavaat, tamanna angutimmariup Neriunami amigaatigissamaarpaa

- Neriunami kisimiilluta savaatilinnik eqqaamioqarata  allaanerussutaavoq,  aamma upernaap kingusinerusarnera, Angutimmarik Hansen oqarpoq.

Savaateqarfimmik ingerlatsisussaq Angutimmarik Hansen  maanna naatsiaanik ruuanillu naatitsisivoq tuniniagassaminik.
Savaateqarneq ingerlallualeriarpat takornarianik tikisitsisarnissaq pilersaarutaavoq.