Europami nataqqornarujussuit aatsaat taama angitigisut
Italiami nataqqornarujussuaq 19 centimeterinik diametereqartoq ataasinngormat nassaarineqarpoq. Europami nataqqornamik aatsaat taama angitigisumik siumuisoqarpoq. Det Europæiske Laboratorium for Kraftige Storme taama ilisimatitsivoq.
Piffissami kingullermi aatsaat taama rekordiliisoqalinngilaq, ullummi tallimat matuma siornatigut aamma rekordiliisoqarami. Nataqqornarujussuaq 16 centimeterinik diameterilik taamanikkut nassaarineqarpoq.
Taanna Italiami aamma nassaarineqarpoq.
USA-mi aviisip The Washington Postip allaaserisaa naapertorlugu nataqqornarujussuaq Italiami ataasinngormat nassaarineqartoq Europami annerpaartaasoq, nunarsuarmi rekordi angungajappaa, nataqqornarujussuimmi nunarsuarmi nassaarineqartut akornanni annersaat 20 centimeterinik diametereqarpoq.
Nataqqornarujussuaq taanna USA-mi 2010-mi nassaarineqarpoq.
Italiami nunap ilaani ulluni kingullerni silapiluppoq. Assersuutigalugu ataasinngormat kallerlunilu nataqqornarujussuarpoq.
Silapilunnerani ajunaartoqartoq
Italiap avannarpasissuani silapiluttarnera innuttaasunut ilaatigut kinguneqarnerlutsitsivoq.
Niviarsiaraq 16-inik ukiulik ilaqutttani ilagalugit tammaarsimaarmat silapilunnerani ajunaartut marluk akornanniippoq. Itailap avannarpasissuani ajunaartoqarpoq. Italiami ministeriuneq Giorgia Meloni taama oqarpoq.
Niviarsiaraq 16-inik ukiulik orpiup illoqarfiup Bresciap ungasinngisaani uppinnerani ajunaarpoq. Brescia illoqarfissuarmit Milanomit kangimut 70 kilometeritut ungasissusilimmiippoq.