Kokainimik anngiortumik Europamut eqqussuisut naalagaat tigusaasoq
Ikiaroornartumik kokainimik anngiortumik Europamut eqqussuisutut pasineqartut ilaat akiorniarlugu politiit nunani arfinilinni pakasaallutik iliuuseqarmata kokainimik eqqussuisut annerit ilaattut pasineqartut tigusarineqarput.
Europami politiit suleqatigiissut Europol tusagassiutinut taama nalunaaruteqarput.
Inuit 49-t politiit pakasaallutik iliuuseqarneranni tigusarineqarput. Tigusarineqartut tassaapput pinerlunniaqatigiinnersut, kokainip Europamut eqqussorneqartup pingajorarterutaasa missaannik eqqussuisutut pasineqartut. Europolip pinerlunniaqatigiit pineqartut Europami annerpaanut ilaanerarpaat.
AAMMA ATUARUK Nunani tamalaani pinerlunniat hunnorujulikkaat attaveqaqatigiilluni atortumit paasineqartut
- Politiit suleqatigiillutik iliuuseqarnerisa pinerlunniaqatigiinnut takutippaa inatsisaatsuliornerit imminut akilersinnaanngitsut, inatsisinillu unioqqutitsisut eqqartuussivitsigut malersorneqarumaartut, Europol allappoq.
Europami nunani assigiinngitsuni, De Forenede Arabiske Emiraterinilu politiit novembarip ulluisa arfineq-pingajuata 19-iatalu akornanni pakasaallutik iliuuseqarput.
Politiit inunnik 49-nik tigusarinninnerisa saniatigut kokaini 30 tonsi aamma arsaarinnissutigineqarpoq.
Europol nunanik tamalaanik suleqateqarluni ukiuni kingullerni marlunni iliuuseqartarsimavoq. Pinerlunniaqatigiit uppisinneqarlutillu akiorniarneqarnissaat pillugu suleqatigiissimallutik.