Nunani tamalaani pinerlunniat hunnorujulikkaat attaveqaqatigiilluni atortumit paasineqartut

Pinerlunniat hunnorujulikkaat nunani tamalaani piffissami kingullermi tigusarineqarsimapput, pinerlunniaqatigiit akiorniarneqarneranni aatsaat taama aaqqissugaatigisumik tigusarinnittoqarluni.

Politeeqarfiit assigiinngitsut marlunngornermi taama ilisimatitsissuteqartut nutaarsiassaqartitsiviup AFP-p allaaseraa.

Australiami mafianiittut rockeriniittullu 200-nit ikinnerunngitsut suliamut atatilluugu tigusarineqarsimapput, suliarlu "Operation Ironside"-imik "Operation Trojan Shield"-imik taaguuserneqarsimalluni.

Australiami pinerlunniat akiorniarneqarneranni aatsaat taama annertutigisumik suleqatigiittoqarpoq. Australiami nutaarsiassaqartitsivik ABC News taama allappoq.

Australiami naalagaaffiup politiivisa USA-llu naalagaaffiata politiivisa FBI-meersut ukiuni pingasuni suleqatigiinneranni tamanna aaqqissuunneqartoq ABC Newsiip allaaseraa.

Pinerlunniat attaveqaqatigiinneranni atortumik app-imik atuinissamut atuisinneqarsimapput, tassa pinerlunniat attaveqaqatigiinneranni atortoq Anonimik taaguutilik atorlugu ilisimanngisaannik naalaarneqarsinnaasimapput. Politiit atortoq taanna atorlugu pinerlunniat 2018-imili naalaarsinnaalersimavaat.

Atortorlu taanna nunani tamalaani pinerlunnianit toqutsiniarnermut pilersaarusiornermi, pinerlunnikkut pissarsianik malunnarunnaarsaanermut, ikiaroornartunillu eqqussuiniarnermi kingornaaamma atorneqalersimalluni.

Toqutsiniarnerit 21-t taamaasillutik paasineqarsimapput pinngitsoortinneqarlutillu, soorlu aamma ikiaroornartut 3000 kiilut sinnerlugit, sakkut 104-t, pigisallu aningaasallu 45 millionit dollarit nalinginut arsaarinnissutigineqarsimasut.

Australiami politiit sumiiffiit 300-t sinnerlugit ataasinngornermi orniguffigisimagaat ABC Newsip allaaseraa. Taamaalinerani USA-mi Europamilu politiit pakasaallutik sumiiffinni amerlasuuni aamma misissuipput.