EU-p siuttuisa Israelip aaqqiagiinngissutsinik sakkortusiartortitsinnginnissaanik kaammattoraat
Kangia Qiterlermi illuatungeriit aaqqiagiinngissutit sakkortusiartortinneqannginnissaat sulissutigisariaqarpaat.
EU-mi nunat naalakkersuinikkut siuttui pingasunngornermi ataatsimiinnerminni taama kaammattuuteqarput. Iranip Israelillu akornanni akerleriissuteqarnerit annikillisinneqarnissaat EU-p USA-tut taamaasilluni annikillisinniarsaraa. Iranimmi Israelillu akerleriissuteqarnerisa Kangia Qiterlermi sorsuttoqalerneranik kinguneqaratarsinnaanissaa EU-p siuttuisa ernummatigaat:
- Iranip Israelimik saassussinera EU-p assuaraa. Nunarsuup immikkoortuani tassani patajaallisaasoqartariaqarlunilu aaqqiagiinngissutit sakkortusineqannginnissaat qulakkeerneqartariaqarpoq, EU-p præsidentia Charles Michel inoqatinut attaveqaqatiittarfikkut X-ikkut allappoq.
Iran qaartartunik ungasianit aqunneqarsinnaasunik raketinillu 300-t missaannik Israelimut sapaatit akunnerata naanerani igeriussereersorlu taama kaammattuuteqartoqarpoq. Iran Israelimik oqaluttuarisaanermi toqqaannartumik siullerpaamik saassussivoq.
Iranip Syriap illoqarfiisa pingaarnersaanni sinniisoqarfiata Israelimit silaannakkut apriilip aallaqqaataani saassunneqarnera akiniarlugu Iran Israelimik saassussivoq. Inuit arfineq-marluk saassussinermi tassani toqutaapput. Sakkutuut naalagaat nuimasut marluk taakkununnga ilaapput.
Akiniaalluni saassussisarnerit unittariaqarput. Ajortut unittariaqarput, EU-mi nunat naalakkersuinikkut siuttui ataatsimiinnermi oqarput:
- Iranip iligisaasalu saassussisarnerisa unitsinneqarnissaat Det Europæiske Rådip kaammattuutigaa, illuatungeriillu aaqqiagiinngissutinik sakkortusiartortitsinnginnissaat aamma kaammattuutigalugu, EU-mi siuttut inerniliipput.
