EU-mi politikkerit Nunarput tapersersorusuppaat
Puisit amiinik EU-mut eqqussequsinnginneq Nunatsinnut atuutinngikkaluartoq, Europamut tunisat ikilerujussuarsimapput. Puisillumi amiinik tuniniaanerup maanna kipiluttunartorsiornarnera, Nunatsinnit peqataasut tusarniaanermi oqariartuutigigaat, tusagassiortoq Rosa Thorsen KNR-imut oqaluttuarpoq.
- Qangaaniilli puisinniartarnerup ulorianartorsiortinneqarnera, KNAPK-p siulittaasuata Leif Fontainip taakkartorpaa. Aamma piniartut EU-miit taarsiiffigineqarnissaat pissusissamisoortippaa. EU-p kalaallit piniartuinut immikkut aaqqiissuteqaraluarnerata ullumikkut iluaqutaannginnera, Great Greenlandip pisortaata, Lars Bergip, takutippaa, tunisat qanoq ikileriarsimatiginersut kisitsisinngortillugu, Rosa Thorsen oqaluttuarpoq.
Piniarnermut naalakkersuisup Ane Hansenip oqariartuutigaa, puisinit tunisassiat EU-mut eqquteqqusaanngineranni kalaallit ilaatinneqannginerat iluaqutaanngitsoq. Taamaammat EU arlaatigut iliuuseqaqqullugu kaammattuivoq.
Ataatsimiinneq alla tullinnguuppoq. Rosa Thorsenillu naliliinera naapertorlugu kalaallit immikkut pineqarnissaannik aalajangersakkap paasisitsiniutiginissaa tassani anguniarneqassaaq.
Tassalu puisit amiinik EU-mut eqqusseqqusinnginneq allanngoruminaakkallarpoq, kalaallilli amernik EU-mi tuniniaasinnaanerat pitsaanerulersinniarlugu iliuuseqartoqassasoq, Rosa Thorsen nalunaarpoq.
- Alloriarnerup tuullerissavaa EU-p nunani ilaasortaasuni innuttaasunut maanna paasisitsiniutigissavaa, ammit tunisat illersorneqarsinnaasumik puisinniarnikkut pissarsiaammata, avatangiisinillu mingutsitsinani tunisassiarineqartarmata. Tassalu EU-mi ilaasortat nunat 27-iusut, taakkunanilu innuttaasut 500 millionit paasisitsiniaaffineqanissaat, kalaallit piniartortaasa 1500-sut pisaat pisiarissallugit ajungilluinartuummata, Rosa Thorsen oqaluttuarpoq.
