EU issittoq pillugu politikkikkut saqqummiussivoq
Silap pissusaata allanngoriartornera ilutigalugu nunat immallu isittumi avannarliit annertuumik pisussaaffiliipput, nutaanillu periarfissiillutik. EU-miillu politikkikkut oqaasertaliilluni saqqummiunneqarpoq issittumi nunat immallu avannarliit mianersuunniarlugit sakkortuumik piumaqaateqarnikkut periarfissat nutaat atorlugit niueqateqartoqarsinnaasoq.
Uulia, aatsitassaqarnerlu eqqarsaatigalugit imarpik ikaarlugu umiarsuarnik assartuineq periarfissaavoq. Taamannalu pinngortitamut issittumilu nunaqavissut inooriaasaannik ataqqinnilluinnarluni mianersuussillunilu ingerlanneqarsinnaavoq. Erseqqissumik oqaatsinut pingasunit oqaatsigalugu, "Ilisimasat, akisussaassuseqarneq, pimoorussinerlu". Tassalu oqaatsit EU-p politikkikkut saqqummiussaani nutaami qulequtarineqartut.
-Taamatut saqqummiussinitsinni nunarsuarmioqatitsinnut takutikkusupparput EU-p issittoq pillugu maleruagassanut pimoorussisoq. Issittup imartaani nunataanilu ineriartorneq isumaqarpoq, uagut sulinitsinni silap pisussaata allanngoriartornera killilersimaanerniarlugu akiuiniarnissarput. Allanngoriartorneq ilutigalugu pilersaarusiornerit, aningaasaqarneq pinngortitarlu eqqarsaatigalugit EU-mi suliassagut amerliartorput. Taammattumillu EU issittup nunataani avannarlerni inuisalu pisariaqartitaat malillugit ataqqinnilluni suleqatiginnikkusuppoq, EU-p nunanut allanut sillimaniarnermullu sinniissaa Catherine Ashton oqarpoq.
EU-p ataatsimiititaliani suliassanut aalisarnermullu sinnisuusoq Maria Damanarki qaammat kingulleq Nuummi tikeraarnermini KNR-mut oqaaseriisani uteqqiinnartuusivai.
-Issittup nunataani imaanilu allanngoriartornerit, nunarsuarmi niueqateqarnissamik ilaatigut periarfissiipput. Pinngortitami avataangiiserineqartut nunarsuarmiunik isiginiarneqarput. Ilisimatuunillu misissuititsinnissamik aningaasaleqataasinnaavugut, nunarsuarmilu silaannaap kissatikkiartornerani issittumi nunat akiuiniarnitsinni illersorsinnaallugit. EU-milu politikki aqqutigalugu nunarsuarmi immat eqqarsaatigalugit ajunnginnerusumik isumaginnittoqarluni aqutsisoqarnissaa anguniarsinnaallutigu.
