Ersiutillit salliunneqartut: Neriniartarfimmukarusuttut katersugaasivimmukarusuttulluunniit aatsaat periarfissaqarpat misissortissasut
Katersugaasivinnut takornarniarusuttut neriniartarfinnullu neriartorusuttut tamakkiisumik akiuussuserneqarsimassapput, coronavirusimilluunniit tunillatsissimannginnermut uppernarsaateqartariaqarlutik. Allamik nalunaaruteqartoqarnissaanut nunatta annersaani taamaassaaq.
Tunillatsissimannginnermullu uppernarsaat sivisunerpaamik akunnernik 48-nik pisoqaassuseqassasoq, nalunaarummi arfininngornermi atuutilersumi allaqqavoq.
- Assersuutigalugu pisiniarfinni allaniluunniit tamakkiisumik akiuussuserneqarsimanermut uppernarsaateqarfiusussani suliguit tamakkiisumik akiuussuserneqarsimanermut uppernarsaateqarnissaq suliartornissannut piumasaqaataanngilaq.
- Aammattaaq inuit Covid-19-imut akiuussutissamik kapitinnissamut innersuunneqanngitsut meeqqallu 17-inik ukiullit 17-illuunniit ataallugit ukioqartut ”coronapas”-imik takutitsisariaqarnermut ilaatinneqanngillat.
Tusarfik: Naalakkersuisut
Tamatuma nunatsinni misissuiviit ilungersorfiutilersinnaavai. Misissortittoqariaannaanavianngilarlu.
AAMMA ATUARUK Coronapas pisiniarfinni piumasaqaataassanngilaq: Malittarisassat unnuap-qeqqanit atuutilertussat aaku
Ilaatigummi coronavirusimik tunillatsissimanermut ersiuteqartut oqartussanit salliunneqassapput.
Naalakkersuisut tusagassiuutinut nalunaarummi taama allapput.
- Taamatuttaaq nunatsinnut tikittut akiuussutissinneqarsimanngitsut allallu peqqinnissakkut naliliivigineqarneq tunngavigalugu tunillatsinnissamut immikkut aarlerinartorsiortutut isigineqartut salliunneqassapput.
- Allalli suli akiuussutissinneqarsimanngitsut ilaatigut imerniartarfimmut neriniartarfinnut ilaalu ilanngullugit siunertaralugu covid-19-imut misissortikkusuttut taamaalillutik periarfissaqarpat aatsaat misissortissinnaassapput, Naalakkersuisut allapput.
Malittarisassat nutaat atuutilermata, inuit assersuutigalugu neriniartarfimmi amerlanerpaamik 20-sinnaanerat atorunnaarpoq.
AAMMA ATUARUK Politiit akiuussutissamik kapitissimanersutit paasiniarlugu unnuap-qeqqanit misilittaaffigissavaatsit
Aamma tamat orniguffigisinnaasaanni qanermut assiaquteqartoqartariaqarunnaarpoq
Malittarisassat taakku Aasiaanni, Upernavimmi Upernaviullu pigisaani nunaqarfinni suli atuupput. Taakkunani tuniluuttoqarnera tamatumunnga pissutaavoq.