Ilaasa USA-p ilaaniinernissaq orniginarsoraat. Ilaallu inissisimaffitsinniiginnassasugut Danmarkimullu ataannassasut isumaqarlutik. Ilaasalu naalagaaffinngornissarput orniginartinneruaat.

Donald Trump Jr.-p illoqarfiit pingaarnersaannut sivikitsumik tikeraarnera Nuummit 500 kilometerinik ungasitsigisumi amerlasuunik assigiinngitsunillu isumaqarfigineqarpoq.

- Donald Trumpip Kalaallit Nunaannut soqutiginninnera uanga assut ulorianartutut isigaara, Jens Danielsen oqarpoq.

USA-p nunatsinnik soqutiginninnera ernumanartuusoq, Jens Danielsen isumaqarpoq. Assi © : Jørgen Simionsen / KNR

- Uagut inuit ikittunnguugatta 100.000-lluuniit ataaniippugut, erniinaq kalaallit oqaasii tammarnissaat aarleqqutigaara. Uanga Danmarkimut ataanarnissarput orniginartinneruara. Pissutigalugu aamma maani Kalaallit Qallunaallu aamma Danmarkimilu kalaallit qallunaallu maanakkut taamak attaveqaqatigiinnerat ajalusuusanngippat, taanna oqarpoq.

Taassumalu Trumpip soqutiginninnera uranimik aatsitassanillu piiaanissamut soqutiginninneq kisimi pissutigissappagu aamma ernumanartuusoraa.

- Mingutsitsinerujussuaq pilersissinnaavaa soorlu uran, aatsitassallu piinaavillugit taamatut Kalaallit Nunaanut soqutiginnissappat, Jens Danielsen oqarpoq.

Eqqiaanermi ikiorti, Karen Kielsen aamma Imaakka Boassen ilinniartuusoq allatut isumaqarput.

Karen Kielsenip USA orniginartutut isigaa. Assi © : Jørgen Simionsen / KNR

- Suna tamarmi akitsoraluttuinnarami Danmarkimiit, nioqqutissat tamarmik akisoorujussuit, Kisianni soorunami USA orniginartinneruara taamaalillunga, Karen Kielsen oqarpoq.

- Uanga akuerivallaanngilakka Qallunaat, immaqa Trumpi akuerinerussagaluarpara, Imaakka Boassen oqarpoq.

Imaakka Boassenillu Karen Kielsenitulli USA orniginartinneruaa. Assi © : Jørgen Simionsen / KNR

- Soorlu suliffeqarfinni qallunaat takussaasorujussuupput aqutsisuusut, uffa massa Kalaallit Nunaanniikkatta kalaallinik aqutsisoqartussaagaluartugut, taanna oqarpoq.

KNR-illu nunarput USA-mut ataleratarsinnaaneranut akuersaarnermik akerliunermilluunniit apersuinerani apersukkat ilaat Anguteq Larsen allatut eqqarsaateqarpoq, apersugarlu alla aalajanginnginnermini ilisimasaqarneruleqqaarusulluni.

Anguteq Larsen nunarput siunissami naalagaaffinngussasoq isumaqarpoq. Assi © : Jørgen Simionsen / KNR

- Uanga iluarnerutissagaluarpara Kalaallit Nunaat namminersulivitsillugu. Soorlu USA Danmarkilu pisariaqartinnagit.

- Kisianni toqqaassaguma USA toqqassagaluarpara. Asuki, apeqqutaavoq Trumpi aamma qanoq iliussanersoq ilaa, Anguteq Larsen oqarpoq.

Karnes Biancop suna eqqortuunersoq isumminnginnermini ilisimasaqarnerunissaq pisariaqarsoraa. Assi © : Jørgen Simionsen / KNR

- Nalunarpoq qanoq ingerlariaqqissinnaanersugut USA-mut ilanngukkaluarutta. Paasisaqarluaqqaarusuppunga pisussanik, Karnes Bianco oqarpoq.

Donald Trumpip kalaallit USA-mut ilaalernertik iluaqutigisinnaagaat qularutiginngilaa, tamanna præsidentinngortussap inoqutinut attaveqaqatigiiffikkut allappaa.