Ernisussiortuunerit Kattuffiat: Nunatta sineriaani ernisarneq ukkatarineqarnerulissaaq

Ernisussiortuunerit Kattuffianni siulittaasunngorniuuttoqaqqammerpoq, siulittaasutullu Anne Schurmann qinigaavoq.

Nunatta sineriaani napparsimmaveqarfiit erniffiusinnaanngitsut siulittaasunngorlaap ukkatarineqarnerulernissaat anguniarpaa.

- Sinerissami ernisinnaaneq aarlerinartorsiorpoq, taamaattoqarnerali illersorniarlugu ukkatarinerusariaqarpagut, kattuffik allappoq. Taakku Aasianni ernisarfiup atorunnaarallaqqanera assersuutigaat.

- Aasianni ernisarfiup atuutiinnarnissaa siunertaralugu EK aaqqissuutissanik siunnersueqataasinnaanini neriuutigaa. EK-p ilaasortaminut sunniuteqartussanik aalajangiisoqartinnagu peqataatinneqartarnissani tusaaniarneqartarnissanilu kissaatigaa, tusagassiuutinut Ernissussiortuunerit Kattuffiat allapput.

Aasianni ernisoqarsinnaajunnaarallarnera Ernisussiortuunerit Kattuffiata ernumanartoqartillugu oqaatigereerpaa.

AAMMA ATUARUK Ernisussiortut peqatigiiffiata Aasiaat ernisarfiujunnaavissinaanera ernumanarteqaat

Tassami arnat amerlanerit erniartorlutik aallartalissapput, ataataasorlu amerlanertigut ilaasinnaaneq ajorpoq. Tamanna kattuffiup oqallisigerusuppaa:

- Illoqarfimmut allamut erniartortoqassagaangat anaanasup pisinnaatitaaffigisariaqarpaa ataataasoq ilaqutaasorluunniit peqataatinnissaa. Tamanna oqallisigineqartariaqarpoq,

kattuffik taama allappoq. Ilanngullugu kattuffiup neriorsuutigaa sinerissami ernisarfiit atuutsiinnarneqarnissaannut amerlanernik suliniuteqarumaarlutik.