Evaldsen: Erninnginnermi allatsiaarsinnaasariaqartut
Meeraaqqerivinnut inissamik utaqqisarnerup sivisusarnera pissutigalugu angajoqqaat ilaat sulinngiffeqareeraluarlutik paarsisussaqannginnertillu pissutigalugu sulilersinnaasanngillat.
Taamaammat angajoqqaat siusinnerusukkut pilersaarusiorsinnaasariaqartut, Evaldsen isumaqarpoq:
AAMMA ATUARUK Perorsaasut akissarsiaat qaffanneqartariaqartut
- Sivikitsuararsuarmik massakkut periarfissaqartarput aaqqiinissamut, tamannalu allanngortikkusullugu una siunnersuut sananikuuara.
Utaqqisut 136-t
Naartusut erninissaq qaammatit pingasut sioqqullugit meeraaqqerivimmut inissamik allatsissinnaalernissaat Kommuneqarfik Sermersuumi kommunalbestyrelsimut ilaasortap Randi Vestergaard Evaldsenip siunnersuutigaa.
Naalungiarsuk qaammatit pingasunngoreersimappagit utaqqisut allattorsimaffiannut allatsissinnaavoq.
Kommuneqarfik Sermersuumi meeraaqqerivinnut utaqqisut katillugit 136-upput.
AAMMA ATUARUK Perorsaasussaaleqineq sanngiinnernik eqquivoq
Sivisuumillu utaqqisuniissinnaaneq pissutigalugu angajoqqaat ilaat, naak sulinngiffeqarnerat qaangiutereeraluartoq, ingerlaannaq suliartorsinnaasanngillat:
- Angajoqqaat ilaatigut feeriassatik ajoraluartumik atortariaqartarpaat, Randi Vestergaard Evaldsen oqarpoq.
Siusissukkut pilersaarusiorsinnaasariaqartut
Erninissamut qaammatit pingasut sioqqullugit allatsittoqartalerpat angajoqqaat ukiup affaata ingerlanerani namminneq paarsisussarsiornissaminnik periarfissaqalissasut, Demokraatit siulittaasuat isumaqarpoq.
Siunnersuutaali meeraaqqerivinni inissat amigaataanerannut aaqqiissutaanavianngikkaluartoq, angajoqqaat eqqissillutik pilersaarusiorsinnaalissasut neriuutigaa:
AAMMA ATUARUK Nuummi inissanik qulakkeeriniarput
- Angajoqqaanngortussat taamaasillutik pilersaarusiorsinnaalissavaat allatut ujartuisinnaaneq imaluunniit kommunimit paasitinneqarlutik meeraq qaqugu inissaqarsinnaalissanersoq, Randi Vestergaard Evaldsen oqarpoq.
Kommuneqarfik Sermersuumi kommunalbestyrelsimi siunnersuut sapaatip akunnerata siuliani siullermeerneqarpoq, amerlanerussuteqartunillu akuerineqarluni ataatsimiititaliamut ingerlateqqinneqarpoq.