Erngup nukingata 2023 rekordinik tamanik qaangiiffigigaa

Nukissiorfiit erngup nukinganik nukissiorfii 2023-mi ulapingaatsiarput, taakku tamarmik tunisassiornermi rekorditik qaangerpaat.

Nunatsinni erngup nukinganik nukissiorfiit minguitsumik nukissiornermi tunisassiornermigut silap pissusianut CO₂-mik 196.837 tonsimik qajassuussivoq. Kisitsit taanna Air Greenlandip timmisartorsuanik Tuukkamik atlantiku qulaallugu timmisartornerit 2.150-it assigigaa, Nukissiorfiit tusagassiuutinut nalunaarummi allapput.

- Kalaallit Nunaata CO2-mik aniatitsineranut erngup nukinga pingaaruteqartuuvoq. Erngup nukinganik nukissiunngikkutta suli annertunermik CO2-mik aniatitaqassaagut, aammalu tunisassiornitsinni aningaasartuutigut annertunerujussuussapput, Nukissiorfiit pisortaat, Cicilie Senderocitz tusagassiuutinut nalunaarummi oqarpoq.

Nukissiorfiit erngup nukinganik nukissiorfiisa Utoqqarmiut Kangerluarsunnguaniittup, Paakitsumiittup, Qorlorsuarmiittut, Sisimiuniittup Tasiilamiittullu rekorditik tamarmik 2023-mi qaangerpaat.

Rekordiliinerit alliliinermik pisariaqartitsiffiusut

Sisimiuni siorna aasaanerani siallingaatsiarpoq. Naallu innuttaasut tamanna immaqa nuannarivallaanngikkaluaraat, tamanna Nukissiorfimmut pitsaasumik atorluarneqarsinnaavoq, tamannalu pissutigalugu nalinginnaasuunngikkaluartumik ukiuunerani qaammatini minguitsumik nukissiuuteqartitsisoqarsinnaassalluni.

Ilulissani erngup nukinganik nukissiorfik aamma ukiumut angusarissaarpoq.

- Ilulissani, nukissiornermik pisariaqartitsinerup siulianut naleqqiullugu annertunerpaaffilimmi, erngup nukinganik nukissiorfigut pilersuisinnaanerat tulluusimaarutigaara, Cicilie Senderovitz oqarpoq.

Nukissiorfiillu minguitsumik nukissamik pilersuineq erngup nukinganik nukissiorfiit allilerneqanngikkunik ilungersorfissaqalinngikkunik killilerneqartariaqalissasut ilisimavaa.

Nukissiorfiit taamaammat assersuutigalugu Nuummut minguitsumik pisariaqartumik nukissiuuteqartitsiinnarnissaq pissutiglaugu alliliinissamut suliniuteqarnissaq pisariaqartippaa.

- Maannakkumiillu allisaqarnissaq Nukissiorfiit iluani piareersarfigaarput, taamaalilluta sapinngisamik atuisartunut amerlanerpaanut nukissamik minguitsumik annertunerpaamik pilersuisinnaanissatsinnut piareersimassagatta, Cicilie Senderovitz oqarpoq.