Erik Jensen Qarsoq Høegh-Dam aamma Minik Høegh-Dam tunngasunut ajuusaartoq

Siumumi qinerneqarnerpaat akornanniittut marluk qatanngutigiik, tassa kommunemut qiningaasoq, Minik Høegh-Dam, aamma inatsisartunut qiningaasoq, Qarsoq Høegh-Dam, maanna inuiaqatigiinnit qinikkatut sullissisinnaajunnaarput.

Qarsoq Høegh-Damip qatanngutaa, Minik Høegh-Dam, Siumumit anisitaagami maannamut sapaatit akunnerluinnaa qaangiuppoq.

Qarsoq Høegh-Dam Siumeersoq Inatsisartunut apriilip ulluisa arfernanni qinigaasoq Inatsisartunit tunuaqqammerpoq.

Taanna Facebookimi taama allappoq.

Inatsisartuni amerlanerussuteqartut Inatsisartuni ilaasortanngortussatut piukkunnanngitsutut nalilerumaaraanni ilimagigini, taanna allappoq.

Siumumi siulittaasup, Erik Jensenip pisoq ajuusaarnaraa. Siumumili malittarisassat piumasaqaatillu malinneqarmata, unioqqutitsisoqaranilu kukkusoqanngitsoq taanna isumaqarpoq.

- Tassunga killittoqarnera soorunami ajuusaarnarpoq aamma systemi arlaatigut qanoq aaqqissuuneqarsinnaanersoq nalilersuinitsinni takutippaa. Imaanngitsoq ajortoq, kisiannili sukkununa qanoruna aaqqissuunneqarsinaaasoq. Akisussaaffillu tamatsinniippoq.

- Taamaalilluta taamannak peqqittoqannginnissaa qulakkeerniartariaqaratigu. Una pisoq nutaajunngilaq, siusinnerusukkummi qinikkat allat taamatut ilineqarnikuupput, Erik Jensen itisiliivoq.

AAMMA ATUARUK Qarsoq Høegh-Dam Inatsisartunit tunuartoq

Piumasaaqaataasunili massakkoqqinnaaq suna pitsanngorsarneqassanersoq tikkuanngilaq.

Inuit Siumup naak qinersinerit atorsinaassanngikkaluartulluunniit qinersiseqarniaannarluni qiningassanngortitsisimaneraasut qanoq oqarfigerusuppigit?

- Ikiaroornartumut akuersaanngiivippugut. Taamaattumik taanna uppernarsarlugu naqissuseqqissavara imaluunniit pasinarsaarineq inissaminiinngimmat taassumalu saniatigut persutaanerit, ajortuliorsimanerit allat, kanngutsaatsuliornerit meeqqanilluunniit innarliisimanerit uagut akuersaanngilluinnarpagut.

Siumup ikiaroornartumut akuersaanngilluinnarnera partiip ileqqorissaarnissamut malittarisassaanut ilaanngilaq.

Taama malittarisassaqarneq allassimasuunngilaq, aammalu suut killiunersut ersarissumik allaqanatik.

Suliammiit suliamut nalilersorneqartartut, siulittaasoq oqarpoq.

Qarsoq Høegh-Dam Inatsisartunut apriilip ulluisa arfernanni qinersiseqarluarpoq. Tassa 796-inik qinersiseqarpoq, Siumumeersunilu taaguunneqarnerpaanut ilaalluni. Taakku tassaapput  Aslak Vilhem-Jensen, Erik Jensen Kim Kielsenilu.

Minik Høegh-Dam 406-init qinerneqarpoq.