Ilulissat Eqqumiitsuliat 150 millionit koruunit nalinganut
- Taamatut annertutigisumik suliaqarniarnerup siunertarivaa illoqarfiup avatangiisitigut kusanartuunissaa, taavalu aamma takornariaqarnikkut eqqumiitsuliat tunngavigalugit avataaninngaanniit tusaamasat eqqumiitsuliortut, kalaallit nunaannilu tusaamasat eqqumiitsuliortut atornerisigut soqutiginarsarlugu suli takornariaqarfittut, Aningaasaqarnermut ataatsimiititaliami siunnersuummik suliaqartuusumi siulittaasoq, borgmester Palle Jerimiassen, oqarpoq.
Siunnersuut Simon Friesemit, eqqumiitsuliani kulturilierinermillu suliffeqarfimmit namminersortumit Creator Projectsimi pisortaasumit saqqummiunneqarpoq.
Perorsaanermik Ilinniarfiup siorna Simon Friese eqqumiitsulianik kusassaajartortippaa, SPS-ip silataa takujuminarsarumallugu. Tikeraap illoqarfik tiguartiffigalugu asannilerfigaa.
AAMMA ATUARUK Meeqqat eqqakkanik eqqumiitsuliaat Taseralimmi saqqummersinneqalersut
Taamaammat kommunalbestyrelsi ataatsimeeqatiseraa, eqqumiitsulianik takussutissanik illoqarfiup immikkoortuini arlalinni pilersitserusulluni.
- Ilulissaniillutik Ilulissat asannilersoorfigisimagaat, taamatut oqarluaannaraanni, Palle Jerimiassen oqarpoq.
Suliniut piviusunngorniassammat kommune siulersuisunik nutaanik pilersitsivoq.
Siulersuisuni issiasut kommunip avataatigut suliaqassasut, namminerli siulersuisooqataassalluni, Palle Jerimiassenip oqaatigaa.
150 millionit koruunit
Sanaartugassat angipput, 150 millionit koruunit missaannik naleqarlutik. Taakkunannga katillugit 9 millionit koruunit missaanniittut kommunep aningaasartuutigissavai. Aningaasat assersuutigalugu sanaartorfigiuminarsaanermut atorneqassapput.
AAMMA ATUARUK Inuusuttut marluk Great Greenlandip iigaanik kusassaasussatut toqqarneqartut
Aningaasat sinneri siulersuisut ujartussavaat.
- Siulersuisoqalertussaavoq, uagut siulersuisuni issiaqataassuugut siulersuisut aningaasartassai pissarsiariniartussaassuai kommune avataatigut.
Avannaata Kommuneani kommunalbestrelsep oktoberip aappaani ataatsimiikkami siunnersuut oqaluuserivaa, taamaalilluni aningaasaqarnermut ataatsimiititaliamut ingerlateqqinneqarluni. Siunnersuut novembarip 27-ani aappassaaneerneqassaaq.