Assi: Taseralik

Meeqqat eqqakkanik eqqumiitsuliaat Taseralimmi saqqummersinneqalersut

Meeqqat Ulluat - tallimanngornermi juunip aallaqqaataani - Sisimiuni "Immami plastikki" sammillugu immikkut saqqummersitsinermik nalliuttorsiutigineqassaaq.

Eqqumiitsuliat kulturikkut illorsuarmi Taseralimmi, meeqqat ulluat malunnartinniarlugu  ukiut tamaasa meeqqat eqqumiitsuliaannik saqqummersitsiviusartumi takuneqarsinnaapput.
 
Taseralik ukioq manna ukiunik qulinngortorsiorpoq, tamatumunngalu atatillugu Maria Motzfeldt, meerarpassuit juullimut ammartakkamit Tammartakkamit eqqaamassagunagaat suleqatiserineqarsimavoq.
 
Ukioq manna sammineqartoq tassaavoq imartatsinni plastikkeqarnera piffissami kingullermi oqallisaalluartoq - tamannalu inuiaqatigiinnut avatangiisunullu ajornartorsiutaanera Taseraliup Maria Motzfeldtillu immikkut sammitikkusuppaat.

AAMMA ATUARUK Saqqummersitsiviup Meeqqat Ulluat Meeqqat Qullissarmiut titartagaannik malunnartinniaraa

Meeqqat ornittagaanni Sikkersumi meeqqat sapaatit akunneranni kingullermi eqqakkat atorlugit eqqumiitsuliorput plastikkinillu eqqakkat kingunerisartagaannik ilinniartinneqarlutik - soorlu plastikkip nungukkiartortarnera qanoq sivisutiginersoq.
 
Assersuutigalugu milluaatip pinngortitami nungukkiartortarnera ukiunik 400-nik sivisussuseqartoq saqqummersitsinermut allagartarsualiami atuarneqarsinnaavoq.
 
- Meeqqat takorluuisinnaanerat mernguernartunillu suliaqarnermigut pinngortitamik ataqqinninnerulernissaat siunertarivarput. Tamattami nunarsuatta pinngortitallu paarilluarnissaanut akisussaaffeqarpugut neriuppugullu peqataasut paarilluaanissamut maligassiusuunissaannik aqqutissiussinnaallugit, Taseralimmi aaqqissuussanik ataqatigiissaarisoq Nuka Alice Lund tusagassiorfinnut nalunaarummi taama oqarpoq.
 
Saqqummersitsineq Meeqqat Ulluanni nal. 14 ammassaaq juunillu 17-iata tungaanut takusarneqarsinnaassalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat