Nuugaatsiarmiut: Eqqumanerlunga sinnattornerlungaluuniit aperisariaqarlunga

Jakob Semionsenip nunaqarfik eqqorneqarmat qimmit pituussaariartupallappai. Ataaserli kipiinnariarlugu qimaasariaqarsimavoq.

 - Illu kajortoq tikingajalerlugu immap iluaniilerama misigisaq sakkortuuvoq. Isumaliulerpungalu annassinnaajunnaarlunga, Jakob Semionsen oqarpoq, nangillunilu:

- Immap iluaniillunga assakaallunga nalunngilara, taava immap iluaniillunga nunamik attuumasaqarlunga malugilerpara. Qaatuaqillunga satsinniarsarivunga, immap naqqatigut sisuukalaaleraluarsimagama amiiaalatassimavunga kilerlungalu, Jakob Semionsen oqarpoq.

Qimaapput

Jakob Semionseni imminut annaanniarluni tamaviaarsuaartillugu, alla illuminiitilluni malissuup illuni anguleraa takuaa:

- Angutaatima angutaa nilliasoq tusaavara;  "Erniik nakkakaarpallupput!" Igalaakkut avammut qiviarlunga takusinnaavara malissuit angusaaleraatigut, kisimiillungalu illup iluani, Ivik Cortzen oqarpoq. 

Oqorsaatit tigoriaannaat tiguinnariarlugit anilluni tuaviinnaq qummut qimaavoq. 

- Tunumut qiviarnaveersaarlunga arpassuataarpunga. Nukillaangajattaraluarlunga arpanniarsariinnarpunga, Ivik Cortzen oqarpoq. 

Jakob minutsip ataatsip missaani immamiissoraaq kiisamili tutiffissarsivoq.

- Qarsutsineq qaangiutiimimmat alloriarfissarsivunga. Taava arpalerpunga arpannermalu nalaani silaarutitallappunga, Jakob Semionsen oqarpoq. 

Tunumullu qiviarami takusani quarsaarutigeqai.

Nunaqarfik allanngorsimaqisoq

- Nuugaatsiap qutsinnerusortaaniilerluta, avammut qinertaarlunga, aatsaat malugisimalerpara. Eqqarsarpungalu Nuugaatsiaq susoruna? Nuugaatsiaq ilisarnarunnaarpoq, Jakob Semionsen oqarpoq. 

Nuugaatsiami kommunefogedip Mikkel Jeremiassenip aallaqqanerani nunaqarfik eqqugaavoq. Qulimiguulimmillu Nuugaatsialiaanneqarami nunaqarfik qulaaniit takullugu ilisarinngitsuungajappaa:

- Qulimiguulimmik S-61-mik Nuugaatsiaq qulangeratsigu takusaq amiilaarnarpoq. Eqqumanerlunga sinnattornerlungaluuniit  aperisariaqarlunga, Mikkel Jeremiassen oqarpoq.

Taamaakkaluartoq Nuugaatsiarmiut tupassimaqisut ikiorneqarnertik qujamasuutigeqaat:

-  Qamuunga attortisimanarpoq taamarsuaq uummateqarfigineqarnerput assut tupallernarpoq, Nuugaatsiami kommunefogedi, Mikkel Jeremiassen, oqarpoq.