Eqqissineq pillugu arpanneq Islandip præsidentiata Nuummut ingerlateqqikkaa
Sri Chinmoy-Oneness-Home-Peace Run tassaavoq eqqissineq pillugu arpanneq. 1987-imi aallartinneqaramili nunarsuaq tamakkerlugu ingerlanneqartarsimavoq. Maannali siullerpaamik kalaallinit peqataaffigineqarsinnaanngorpoq. Suliniaqatigiiffik arpatsitsinermik aaqqissuisuusoq tusagassiorfinnut nalunaaruteqarluni taama allappoq.
Arpatsitsineq nunarsuaq tamakkerlugu tusaamaneqartumut mediterernermi anersaakkut siulersortimut Sri Chinmoyimut atsiussaavoq. Taassuma 'eqqarsaatit pitsaasut, ikinngutigiinneq, pitsaasumik inooqatigiinneq eqqisseqatigiinnerlu aqqutigalugit inunnik ataqatigiissitsinissaq siunertaralugu" arpatsitsineq 1987-imi aallarnerpaa.
Nuummi sapaatit-akunnerani ataatsimi ingerlatsisoqassaaq, ilaatigullu illoqarfimmi meeqqat atuarfii tamaasa pulaarneqassapput, aamma ilaqutariinnik arpatsitsisoqassaaq, kulturikkut illorsuup Katuap saavani aallartittumik.
Arpatsitsineq Islandimit sapaatit-akunnerata naanerani nunatsinnut ingerlateqqinneqarpoq. Præsidentip Guðni Th. Jóhanessonip innuttaasullu eqqissineq pillugu ikumatitaq tigumiarlugu arpaqatigiipput, tassungalu atatillugu Nunatsinnut ingerlateqqinneqarluni.
Nuummut tikeraarnermut atatillugu, Nuuk pisortatigoortumik "Illoqarfiit pingaarnersaannik eqqissinermik anguniagalittut" suaarutigineqarpoq. Illoqarfiit allat, soorlu Reykjavik, Stockholm aamma Ottawa siornatigut Sri Chinmoy-Oneness-Home-Peace Runimit taamatut suaarutigineqarsimapput.
Tikeraarnermut atatillugu pilersaarut uani atuarneqarsinnaavoq.