Eqqartuussiviit iluarsartuunneqaqqinnissaat kiisami sammineqartoq
Eqqartuussiviit iluarsartuunneqaqqinnissaanni eqqartuussiveqarfiit maanna 18-iusut maanna kommuneqarfiusut sisamanut agguluttorneqarnissaa anguniarneqarpoq.
Nunatsinnimi inatsiseqarneq annertusiartuinnartillugu paasiuminaanneruleriartuinnartillugulu eqqartuussisut pikkorissut eqqartuussiviillu suliarinnillaqqissut pisariaqartinneqaleriartuinnarput. Eqqartuussivinnili sulisut ilinniarsimasut atatiinnarniartarneri pisariuleriartuinnavippoq, tamatumalu kingunerisaanik eqqartuussivinni suliat sivitsortoorutigineqartalerput, asulu sulliarinerlutaagajuttalersimallutik.
Taamaammat eqqartuussivilerinermik suliallit nukittorsarneqarnissaat anguniarlugu, eqqartuussisullu pikkorissut ulloq naallugu sulisinnaasut pigineqalerneqarniassammata eqqartuussiveqarfinnik kattussuisoqarnialerpoq. Tamannami anguneqarsinnaassappat suliffeqarfinnut annertuunut periarfissatsialaat ammaanneqassasorineqarput.
Eqqartuussiveqarnermummi inatsit 2010-mili atuutsinneqalersumi eqqartuussisut - tassa kredsrettini eqqartuussisut - immikkut ilinniartinneqartalerput ataavartumillu eqqartuussisutut atorfinitsinneqarsinnaanngorlutik. Makkulumi anguneqarnissaanut ukiut pingasut piffissaliunneqarsimapput, ukiorlu manna ukiortaami piffissarititaasoq qaangerneqassalluni. Eqqartuussisulli immikkut ilinniartinneqartut suli naammaqqajanngimmata Nunatsinni eqqartuussiviit iluarsartuuteqqinneqarnissaat akuersissutigineqassappat piffissaliussaq ukiuni pingasuni sivitsorneqaqqissinnaassaaq.
Inatsisartummi inatsisit pillugit ataatsimiititaliaata isumaa malillugu eqqartuussivinni suliassat malinnaavigineqassappata kredsdommerit ulloq naallugu sulisartut katillugit aqqaneq marluusariaqassapput, maannalu suliassat qaleriiaatiinnaleqqasut angummaffigineqassappata sulisut suli amerlanerusut pisariaqartinneqassallutik. Kredsdommerit immikkut ilinniarsimasut ullumikkut katillugit arfiniliinnaapput.
Aamma eqqartuussiveqarnerup iluasartuuteqqinneqarnissaanut atatillugu suliassat allat, soorlu Nuummi eqqartuussiviup allilerneqarnissaa kiisalu illoqarfinni allani pingasuni eqqartuussivissanik pilersitsitsisosoqarnissaa qanoq akeqassanersoq suli iluamik ilisimaneqanngitsoq Inatsisartut inatsisit pillugit ataatsimiititaliaata tikkuartuuppaa.
Nunarpulli sinnerlugu Folketingimi ilaasortap Sara Olsvig-ip eqqartuussiveqarnerup iluarsartuuteqqinneqarnissaa qanoq akeqassanersoq Danmarkimi inatsisinik atuutsitsinissamut ministeri aperimmagu 28,7 millionit koruunit ukiuni tullinnguuttuni sisamani atugassat qallunaat naalakkersuisuinit immikkoortinneqareersimasut paasitinneqarpoq.
Innuttaasulli eqqartuussiveqarnerup iluarsartuuteqqinneqarnissaanut atatillugu eqqugaasussat aaqqiivigineqarallarsimapput, tassami sumiiffinni eqqugaasussani eqqartuussiviugallartussanik pilersitsitsisoqassaaq, taakkunanilu eqqartuussivinni suliassat ilaat ingerlanneqartassallutik.
Eqqartuussiveqarnerup iluarsartuunneqarnissaanut inatsimmut allannguutissamut siunnersuut Inatsisartutta oktobarip 25-iani aappassaaneerlugu oqaluuserissavaat. Inatsisimut allannguutissamut siunnersuut siullermeerutaasumik oqaluuserineqarmat inatsisartut amerlanerussuteqarluartut akueraat.
