Eqqartuussisuuneqarfiata niviarsiaqqap aqqanilinnik ukiullip toqunneqarneranut pineqaatissiissut aalajangiiffigissagaa

Angut 28-nik ukiulik niviarsiaqqamik Aasianni toqutsisimasutut sapaatip akunnerata siuliani eqqartuunneqarpoq.

Ilulissani eqqartuussiviup angut pinerluuteqarsimasutut ukiuni arfineq-pingasuni pineqaatissinneqarsimasunut inissiisarfimmiittussanngortippaa.

Tamannali illersuisup unnerluussisussaatitaasulluunniit ilorrisimaarutiginngilaat. Taamaammat illuatungeriit tamarmik suliamik suliareqqitassanngortitseqqinniarlutik aalajangeraat, Sermitsiaq.ag allappoq.

- Pineqaatissinneqarsimasunut inissiisarfimmiittussanngortitsinermik annertussusiliineq ukiunit arfineq-pingasunit sivikinnerusariaqartoq uagut isumaqarpugut, illersuisut eqqartuussissuserisuat, Finn Meinel tusagassiorfimmut oqarpoq.

AAMMA ATUARUK Angut 28-nik ukiulik niviarsiaqqamik aqqanilinnik ukiulimmik toqutsisimasutut eqqartuunneqartoq

Pineqaatissiinermut tunngasortaa illuatungeriit tamarmik ilorrisimaarutiginngilaat. Unnerluussisussaatitaasut aalajangiisussaagunik angut ukiuni qulini pineqaatissinneqarsimasunut inissiisarfimmiitsinneqassaaq, illersuisorli tamanna ukiut arfiniliussasut isumaqarpoq.

Angut pisuusersoq pisuunnginnersorluunniit pillugu apeqqut illersuisup suliassanngorteqqinnianngikkaa Sermitsiaq.ag allappoq.

Sukannersumik pineqaatissiineq

Eqqartuussiviup 28-nik ukiullip toqutsinissamut siunertaqarsimassangatinneqarnera tassa angutip iliuutsini niviarsiaqqap toquneranik kinguneqarsinnaasoq ilisimasimassagaa pingaartuutippaa.

Tamatuma saniatigut unnerluutigineqartoq niviarsiaqqamik toqutsinissamut pissutissaqanngimmat kiisalu 28-nik ukiulik aqqanilinnik ukiulimmit anginerungaatsiarmat pillaanissamik naliliinerup sukannersuunera eqqartuussiviup pingaartuutippaa.

Eqqartuussisoqarnerani ilisimannittut arlallit nassuiaateqartinneqarput. Niviarsiaqqap arnaa nassuiaateqartunut ilaavoq.

Taassuma panini ikinngutiminut pinnersaammik siorna novembarip ulluisa 26-anni tunniussiartornissamut isumaqatigiissuteqarsimasoq nassuiaatigaa.

AAMMA ATUARUK Toqutsisutut pasisaq: Toqutsinissara siunertaanngilaq

Ikinngutigiit taakku tatsip eqqaani naapinniarlutik isumaqatigiissimapput, ikinngutaasulli aqqanilinnik ukiulik takkussimanngitsoq angajoqqaaminut oqaatigisimavaa.

Niviarsiaqqap arnaa unnuk taanna panimi oqarasuaataanut sianerniartarsimagaluarluni oqaluttuarpoq, oqarasuaalli attaveqarsimanngilaq.

Anaanaasup angut 28-nik ukiulik ilaquttami panimmiluluunniit siornatigut ilisarisarisimanngikkaat aamma uppernarsarpaa.

Eqqartuussiviup ukiuni arfineq-pingasuni pineqaatissinneqarsimasunut inissiisarfimmiitsitsinissamik eqqartuussuteqarnermi saniatigut 28-nik ukiulik niviarsiaqqap angajoqqaavinut immikkut 100.000 koruuninik aamma taarsiissuteqartussanngortippaa.