Toqutsisutut pasisaq: Toqutsinissara siunertaanngilaq
Aasianni niviarsiaqqamik aqqanilinnik ukiulimmik siorna novembarimi toqutsisutut pasineqartup, angutip maanna 28-nik ukiullip, niviarsiaqqamut toqqutigisaanik unnerluussummi nakuusersimanerarneqarpoq.
Pasineqartup nakuusersimanerarneqarnini Ilulissani Qaasuitsup Eqqartuussisoqarfiani ullumi ilumoornerarpaa, toqutsinissanili siunertarisimannginnerarlugu.
AAMMA ATUARUK Unnerluussisut: Toqutsineriinnaanngilaq meeqqamilli toqutsineruvoq
Illuatungeriit, unnerluussisussaatitaasunit, Christian Halstad, pasineqartullu illersuisua aamma nunatsinni illersuisuunerusoq, Finn Meinel, nassuiaareermata unnerluussisoq siorna pisoqarfiup nalaanit videokkut immiussanik takutitsivoq. Tassani angut niviarsiararlu pisuttut ersipput. Unnerluussisup angut pisuttoq videomi takuneqarsinnaasoq, unnerluutigineqartuunersoq aperimmat namminiunerarlugu unnerluutigisaq akivoq.
Apeqqutilli allat amerlasuut akinissaat ajornakusoortittarpaa, eqqaamasaqarpiannginnerartarlunilu.
Pasisaq: Meeraanersoq inersimasuunersoq ilisimanngilara
Unnerluussisup, Christian Halstadip, KNR-mut eqqartuussivimmi suliap aallartinnera sioqqullugu oqarnera naapertorlugu niviarsiaraq pasineqartorlu pisoq sioqqullugu imminnut ilisarisimasuunngillat.
Tamannalu pasineqartup eqqartuussivimmi aamma erseqqissarpaa. Pasineqartup nakuuserfigisani qassinik ukioqarnersoq, pisumi pisullu kingorna ilisimasimanngilaa. Aatsaalli ullut arlallit qaangiummata suleqatiminit paasillugu, toqusoq meeraasoq aqqanilinnillu ukioqartoq.
AAMMA ATUARUK Unnerluussisussaatitaasut 11-nik ukiulimmik Aasianni toqutsinermut suliami ukiuni qulini isertitsivimmiitsitsiniartut
Nammineerluni eqqartuussivimmi nassuiaanera naapertorlugu tamanna tusaramiuk tupallunilu kanngusussimavoq. Oqarfigineqarnermi nalaani pisoq pillugu inunnut allanut oqaluttuarsimannginnerarpoq.
Ilisimannittut aggersarneqartut
Eqqartuussivimmi suliaq sisamanngornermi nanginneqassaaq. Tassani inuit pingasut ilisimannittutut unnerluussisussaatitaasumit aggersarneqarput. Taakkua nassuiaareerpata eqqartuussineqassasoq pilersaarutaavoq.
Unnerluussisussaatitaasut unnerluussap pisuutinneqaruni pineqaatissinneqarsimasunut ukiuni qulini inissiisarfimmiinnissaa siunertarigaat, illersuisoq isumaqarpoq, ukiuni arfinilinni taama pineqassasoq.
Angut unnerluussaq niviarsiaqqamik siorna novembarip ulluisa 26-anni nalunaaqutaq 20.30-p 20.40-llu akornanni toqutsisimasutut unnerluutigineqarpoq, sapaatillu akunnerat missaa qaangiuttoq tigusarineqarpoq.