Unnerluussisut: Toqutsineriinnaanngilaq meeqqamilli toqutsineruvoq

Unnerluussisussaatitaasut angummut pasisaminnut, siorna pisup nalaani 27-nik ukioqartumut, ukiuni qulini pineqaatissinneqarsimasunut inissiisarfimmiititsinissaq piumasarigaat, suliaq pillugu unnerluussisussaatitaasuni aqutsisoq oqarpoq.

- Unnerluussisussaatitaasut unnerluussummi allaqqasutut, pineqaatissinneqarsimasunut ukiuni qulini inissiisarfimmiititsisussanngornissaq piumasaraat.

- Suliaq ilungersunartorujussuartut isigaarput. Toqutsineriinnaanngilaq, uani meeqqamik toqutsineq pineqarpoq, Christian Halstad oqarpoq.

Taanna aamma nassuiaavoq unnerluussisussaatitaasut naliliinerat malillugu suliaq ilisarisimanngisamut toqutsinermut tunngassuteqartoq. Imannak paasillugu pasineqartoq niviarsiararlu pisoq sioqqullugu imminnut ilisarisimanngitsut.

Illersuisoq: Sivikinnerussaaq

Angut toqutsinermit sapaatit akunnerat missaa qaangiuttoq tigusarineqarpoq. Politiit angut niviarsiaqqamik toqutsisimalluni nassuertoq, kingusinnerusukkut oqarput.

Unnerluutigineqartup illersuisuata, nunatta illersuisuunerata, Finn Meinelip, sullitami sivikinnerusumik pineqaatissinneqarsimasut inissiisarfianiinnissaa anguniarpaa.

- Inuiartoqarsimanerani ukiunik arfinilinnik pineqaatissiineq nalinginnaasuuvoq, taannalu angorusupparput.

- Unnerluussisussaatitaasut ukiunik qulinik piumasaqarput. Sullitara unnerluussut malillugu eqqartuunneqarpat, tassa niviarsiaqqamik toqutsisutut, taava uagut isumaqanngilagut pineqaatissinneqarsimasunut ukiut qulit inissiisarfimmiissasoq, sivikinnerussaarli, Finn Meinel oqarpoq.

AAMMA ATUARUK Unnerluussisussaatitaasut 11-nik ukiulimmik Aasianni toqutsinermut suliami ukiuni qulini isertitsivimmiitsitsiniartut

Taassuma sullitaatalu unnerluussap, niviarsiaqqamut nakuusersimanerarneqarnera assortunngilaat.

- Sullitara pisut ilaannut, nakuusersimanerarneqarnerminut niviarsiaqqap toqqutigisaanut pisuunerarpoq.

Eqqartuussivimmi suliaq ullumi aqagulu pisussatut pilersaarutaavoq.

Suliap eqqartuussivimmi suliarineqarnerata nalaani, toqutsinermi peqataasut aqqinik taaguinnginnissaq, unnerluutigineqartup illersuisuanit piumasarineqarpoq.

- Una suliaq kikkunnit tamanit eqqumaffigineqarpoq. Taamaattumik pisumi akuusut illersorniarlugit najuuttut aqqisa allattorneqannginnissaat eqqartuussivimmut qinnutigaarput.

AAMMA ATUARUK Aasiammiu Arqaluk Brandt Johansen: Pisoq oqimaattorsiorfiuvoq

Angut unnerluussaq niviarsiaqqamik siorna novembarip ulluisa 26-anni nalunaaqutaq 20.30-p 20.40-llu akornanni toqutsisimasutut unnerluutigineqarpoq.

Tamanna KNR-p allagaatinik noqqaalluni takunninnerani, politiit unnerluussissutaanni allaqqavoq.

Aasianni eqimattat namminneq piumassutsiminnik ikiuuttut niviarsiaqqamik unnukkut angerlarsimanngitsumik taamani ujaasipput. Niviarsiaraq KJ Greenlandip Wille Brandsvejllu akornanni tummeqqani toqungasoq unnukkut nassaaraat.