Aasiammiu Arqaluk Brandt Johansen: Pisoq oqimaattorsiorfiuvoq
- Isumaqarpunga Aasianni innuttaasut maannakkut, imatut pisoqarfiani oqimaattorsiortut. Misigissutsikkut assoroornarpoq, tassami soorlu ilaatigut takugipput nutaarsiassat ilaanni, nalinginnaasuunngilaq niviarsiaraq aqqanilinnik ukiulik toquinnarsinnaasoq, taamaattumik taamaattumik pisoqarfiani isumaqarpunga innuttaasunut oqaimaattorsiornartuuvoq, Arqaluk Brandt Johansen oqarpoq.
AAMMA ATUARUK Politiit: Niviarsiaqqamik aqqanilinnik ukiulimmik toqusoqarnera nalinginnaasuunngilaq
Taanna Aasianni najugaqarpoq, ulluinnarnilu Kommune Qeqertaliup radioanik aqutsisuulluni, taamaammat illoqarfimmi inuppassuit attaveqarfigisarpai.
Piffissaq assoroornartoq
Aasianni meeqqat inuusuttut akornanni piffisami kingullermi qassiiusunik toqusoqarpoq, ilaatigut meeraq napparsimanermi kingunerisaanik toqulluni. Aasianni innuttaasut 3000-it missaanniittut akornanni amerlanerit imminnut ilisarisimasariimmata piffissaq soorunami assoroornarpoq.
Taassuma Aasianni inuit akornanni nuanninngitsumik nalaataqarneq nassuiaatigaa. Niviarsiaqqap aqqanilinnik ukiullip toqqutigisaanik politiit aalajangersaasinnaannginnerat pissutigalugu nalorninermik ilaatigut pilersitsisoqarpoq.
- Soorunami nuanninngitsutut misiginarpoq, taanna qularnanngilaq, nuanninngilaq. Aamma nalorninermik ilaqalerami. Soorlu oqarnittut nalinginnaasuunngilaq meeqqap aqqanilinnik ukiullip toquinnartarnera, taamaattumik nalorninartoqarpoq, inuillu nalornisut nuanniilliornissaminnut qaninnerusarput.
- Taamaattumik misiginerat taanna sakkortuvoq. Takusinnaavara tusaasinnaasutullu illugu taamatut pisut aliasuutigineqarput. Nipituuliuutigineqanngikkaluarput, kisianni inuit pissusilersuutaatigut soorunami takuneqarsininavoq mianersukannertunnguamik ullut makku atorneqarput. Nalugamikku susoqartoq taannalu alianarpoq, Arqaluk Brandt Johansen oqarpoq.
AAMMA ATUARUK Niviarsiaraq Aasianni toqungasoq nassaarineqartoq: Politiit takunnissimasussarsiortut
Eqqaaniaanerit
Illoqarfimmi mikisumi alianartumik pisoqarneranut atatillugu innuttaasut ilaatigut facebook aqqutigalugu qimagaasunut misiginneqatiginninnerminnik takutitsiniarlutik aaqqissuussipput.
- Angerlarsimaffiit ataasiakkaat silataanut katersuuttoqartarpoq. Tassani naneruutinnguanik ikitsineq tussiutinnguanillu atuineq inuit iliuusererusuttaraat malunnarpoq. Misiginneqataaneq aamma immaqa saammarsaataalaarsinnaasumik iliuuseqarusunneq, tassanilu takusarpagut aamma ilaasa aliasunnerat takuneqarsinnaasarpoq. Nipaarsaakannertumik pigaluaruaraanni tusarsaasarpoq noqissinnaanatik aamma qiatik anniinnartaraat, Arqaluk Brandt Johansen oqarpoq.