Niviarsiaraq Aasianni toqungasoq nassaarineqartoq: Politiit takunnissimasussarsiortut
Aasianni toqungasumik nassaartoqarpoq. Niviarsiaraq KJ Greenland Aasiaat aamma Wille Brandtsvejip akornanni majuartarfinni toqungasoq nassaarineqarpoq. Niviarsiaraq isumaqatigiissut malillugu angerlanngimmat nammineq kajumissutsiminnik ikiuuttut ujaasipput.
- Pisumi piffisssami matumani pinerluttoqarsimaneraasoqarsinnaanngilaq, taamaammat politiit suliamik misissuipput, politiit tusagassiuutinut nalunaarummi allapput.
Politiit toqusoqarneranut atatillugu takunnissimasussarsiorput, taamaammat takunnissimasinnaasunik pissarsinissartik neriuutigalugu niviarsiaqqap toqusimasup nassuiaatigineqarnera saqqummiuppaat.
- Politiit toqusoqarneranut atatillugu paasissutissaateqarsinnaasut saaffiginninnissaat kaammattuutigaat, aamma naak suliamut pingaaruteqarsorinngisaminnik takusaqarsimagaluarunik, politiit allapput.
Pineqartoq ima nassuiaatigineqarpoq: niviarsiaraq aqqanilinnik ukiulik, 150 centimeterit missaannik angissusilik, tuattoq, nujai immorissut. Niviarsiaqqap tasseq qasertoq taartoq Royal Arctic Linemik meqqeqartoq atorpaa, Canada Goosemik aappaluttumik ukiorsiummik kavaajaqarpoq, tungujortunik taartunik qarlippaaqarpoq qernertunillu kameqarluni.
Politiit oqarnerat naapertorlugu niviarsiaraq angerlarsimaffimminit Pujooriarfimmit sisamanngornermi unnukkut nalunaaqutaq arfineq-pingasut missaanni ingerlagami kingullermik takuneqarpoq.
Aasianni innuttaasut ippassaq unnukkut Pujooriarfiup Wille Brandtsvejillu akornanniissimasut suliamulluunniit attuumassuteqarsinnaasunik paasissutissaateqartut politiinit oqarasuaammut 701424-mut nalunaaqutarlu 16.00-ip kingorna 701448-mut sianissasut, politiit allapput.
Ilulissanit, Sisimiunit Nuummiillu misissuinermi ikiuiartortut ullumi aqagulu tikissapput.
Danmarkimiillu toqungasup timaanik misissuisartoq pinerluttoqarsimaneranillu misissuisartut marluk marlunngornermi aamma tikissapput.
