Politiit: Niviarsiaqqamik aqqanilinnik ukiulimmik toqusoqarnera nalinginnaasuunngilaq
- Niviarsiaqqamik aqqanilinnik ukiulimmik toqusoqarnera nalinginnaasuunngilaq. Taamammat ilumut pinerluttoqarsimannginnera qulakkeerumallugu suliaq misissoqqissaarparput.
Kalaallit Nunaanni Politiit pinerluttoqarsimaneranik paasiniaasartuisa pisortaat, Simon Andrés, KNR-imut taama oqarpoq.
Niviarsiaraq toqungasoq siumorneqarsimasoq tallimanngormat ualikkut nalunaarutigineqarpoq. Niviarsiaraq taanna sisamanngormat kingullermik takuneqarsimasoq, KJ Greenland Aasiaat aamma Wille Brandtsvejip akornanni majuartarfinni toqungasoq nassaarineqarpoq.
Niviarsiaraq toqungasoq angajoqqaavinut maannamut suli takoqqusaanngilaq. Tamanna politiit niviarsiaqqap toquneranut uppernarsaataasinnaasunik suli misissuinerannik peqquteqartoq, pinerluttoqarsimaneranik paasiniaasartut pisortaat nassuiaavoq.
AAMMA ATUARUK Niviarsiaraq Aasianni toqungasoq nassaarineqartoq: Politiit takunnissimasussarsiortut
Simon Andrésip niviarsiaraq taanna sumik toqquteqarsimanersoq oqaatigisinnaanngikkallarpaa, tamaammallu Aasianni toqutsisoqarsimanersoq oqaatigisinnaanngikkallarlugu. Toqungasup timaanik misissuisartup Danmarkimiit aqagu marlunngornermi tikinissaa utaqqimaarneqarpoq.
Suliaq misissoqqissaarneqassaaq. Politiit videomik immiussat ujaasiffigeqqissaaleruttorpaat, taamaammallu inuit politiit paasiniaanerannut iluaqutaasinnaasunik nakkutilliissutinik assigisaannilluunniit videoliuutillit saaffiginneqquneqarput.
Politiit suleqataallu qassit suliamik paasiniaaqataanersut, politiit paasiniaasartuisa pisortaata ilisimatitsissutigisinnaannginnerarpaa, kisianni:
- Kalaallit Nunaanni Politiit suliaq massakkorpiaq salliutippaat, Simon Andrés KNR-imut oqarpoq.
Ilisimannittut arlallit saaffiginnissimasut
Politiit tallimanngormat ilisimannittussarsiulerput.
Aasiammiut niviarsiaqqamik toqungasumik nassaarfiusup eqqaaniissimasut arlallit saaffiginnipput. Politiilli nassaarfiusup tallimanngornermut unnuaani eqqaaniissimasunik suli ilisimannittussarsiortut, politiit paasiniaasartuisa pisortaat erseqqissaavoq. Biilerlutik takunnissimasinnaasut aamma pineqarput.
Politiit niviarsiaqqap toquneranut atatillugu paasissutissaateqarsinnaasut saaffiginninnissaat kaammattuutigaat, aamma suliamut pingaaruteqarsorinngisaminniilluunniit takusaqarsimagaluarunik. Ilisimannittut takusimasaat tusaasimasaalluunniit suliamut attuumassuteqarnersut politiit naliligassaraat. Saaffiginnittut tamarmik qujarunneqassapput.
Ilisimannittut qanoq oqarsimanersut, politiit paasiniaasartuisa pisortaata KNR-imut erseqqissarusunngilaa.
Nassaarineqartoq tassaavoq niviarsiaraq aqqanilinnik ukiulik, 150 centimeterit missaannik angissusilik, tuattoq, nujai immorissut. Niviarsiaqqap tasseq qasertoq taartoq Royal Arctic Linemik meqqeqartoq atorpaa, Canada Goosemik aappaluttumik ukiorsiummik kavaajaqarpoq, tungujortunik taartunik qarlippaaqarpoq qernertunillu kameqarluni.
Niviarsiaraq angerlarsimaffimminiit Pujooriarfimmit sisamanngornermi unnukkut nalunaaqutaq arfineq pingasut missaanni ingerlagami politiit oqarnerat naapertorlugu kingullermik takuneqarpoq.
Aasianni innuttaasut suliamut attuumassuteqarsinnaasunik paasissutissaatillit politiinut oqarasuaatikkut 701424-mut nalunaaqutallu 16.00-ip kingorna 701448-mut sianissasut, politiit kaammattuipput.
