Eqqartuussisutut ilinniarfimmi naammassisussat eqqartuussivimmi sullissisarneq sivikinnerulersissavaat
Kalaallit Nunaata Eqqartuussiviani, ilinniarsimasunik sulisussaaleqisarneq pissutaalluni, suliassat katersuutiiinnalersimapput.
Tamannalu anigorniarlugu Kalaallit Nunaanni Eqqartuussivik inatsiseqarnermut ministereqarfimmit 2013-imi aningaasanik 20 millionit koruuninik immikkut aningaasalerneqarpoq, pissutsillu iluarsiartortutut isikkoqarput.
Aningaasammi taakku ilaat eqqartuussisutut ilinniartitaanermut atorneqarnikuummata. Kalaallit Nunaanni Eqqartuussivimmi pisortaallunilu eqqartuussisuusoq Birgit Skriver, KNR-imut oqarpoq.
Aamma atuaruk Eqqartuussivinni suliassat ikilisut
- Nuannaarutigalugu oqaatigisinnaavara eqqartuussisutut kandidatinngornianik februaarip aallaqqaataanit aappaaguagumut ilinniartoqalertussaammat, iluatsissimavarpullu ilinniartut taakku sisamaasut ilinniarneranni eqqartuussivimmi suligallartinnissaat, Birgit Skriver oqarpoq, nangillunilu.
- Neriuutigaarpullu siunissami maani atorfinitsissinnaassallutigit, ilinniarsimasunimmi amigaateqarnerput annikilleriassaaq suliassallu annikilleriarlutik.
Eqqartuussisullu qanoq pisariaqartinneqartigineri sunullu iluaqutaassanersut, eqqartuussinermut ilinniarfimmi pisortap, Kirsten Thomassenip, oqaluttuaraa.
- Immikkoortunut marlunnut iluaqutaassaaq, siulliullugu eqqartuussisunik ilinniarluarsimasunik amigaatigeqisatsinnik atorfinitsitsissaagut, arlalinnimmi eqqartuussisoqaratta ilinniakkaminnik naammassinikuunngitsunik. Aappassaanik eqqartuussisutut ilinniartitaanerup qaffassartuarnissaa qulakkeersinnaalissavarput, ukumi ilinniartut sisamaasut ilinniarfimmit soraarummeerlutik angusippata pisariaqartitavut annertuut nammassisinnaalissagatsigit, Kirsten Thomassen oqarpoq.